FM05/39: Naalakkersuisut Inatsisartullu pillugit Inatsisartut inatsisissaattut siunnersuummik suliaqarnissamik suleqatigiissitat suliassaasa... (Naalakkersuisut siulittaasuat)
3. maj 2005 UPA2005/39
Inatsisartut suleriaasianni § 32 naapertorlugu aalajangiiffigisassatut siunnersuut matumuuna Naalakkersuisut saqqummiuppaat:
Naalakkersuisut Inatsisartullu pillugit Inatsisartut inatsisissaattut siunnersuummik suliaqarnissamik suleqatigiissitat suliassaasa allanngortinneqarnissaannut Inatsisartut aalajangiiffigisassaattut siunnersuut.
(Naalakkersuisut siulittaasuat)
Tunngavilersuut:
UPA 2005/25-ip immikkoortup Inatsisartut oqallisigisaat Inatsisartullu tassannga suliarinninnerat pillugu nalunaarusiaq Naalakkersuisut innersuussutigaat.
Inatsisartut nalunaarummik suliarinninnerat tunngavigalugu Naalakkersuisut siunnersuutigaat suleqatigiissitat suliassaanni makkua allanngortinneqassasut.
Siunnersuutigineqarpoq suliassani immikkoortup kingulliup tullia peerneqassasoq. Suleqatigiissitat sulinerannut piffissamik pilersaarut immikkoortumi tassani pineqarpoq. Immikkoortoq oqaaseqaatigiinnik makkuninnga taarserneqarnissaa siunnersuutigineqarpoq:
"UPA2005/25-ip immikkoortup ataani Inatsisartunit suliarineqartoq suleqatigiissitat 14. april 2005-imeersumi nalinaarusiaanni allaaserineqartutut suliamik ingerlatseqqinneq politikkikkut aaqqissuussaaneq ilaatillugu suleqatigiissitat aaqqissuutissavaat piviusunngortillugulu. Suleqatigiissitalli pingaartippaa aktiaateqarluni ingerlatseqatigiiffinni tamakkiisumik ilaannakuusumilluunniit Namminersornerullutik Oqartussanit pigineqartuni Inatsisartut ilisimasaqarnissaat pillugu ajornartorsiutaajunnartut sukkanerusumik suliarineqartarnissaat, taamaalilluni tamanna pillugu inatsisissatut siunnersuummut immikkut missingiummik piareersimasoqarniassammat UKA 2005-imi suliarineqartussamik."
Tamakkua saniatigut suliassani qulequttap aaqqissuinikkut allanngortinneqarnissaa siunnersuutigineqarpoq.
Allannguutissat siunnersuutigineqartut suliassarititamiittut aalajangiiffigisassatut siunnersuummut matumunnga ilanngunneqartoq ilanngullugu agguaanneqarpoq.
Naalakkersuisut inassutigaat suleqatigiissitat suliassaasa allanngortinneqarnissaannik siunnersuutigineqartut Inatsisartut akuersissutigissagaat.
Taamatut oqaaseqarlunga Inatsisartut oqaluuserisassaattut siunnersuut ingerlateqqinneqarpoq.
Upernaakkut ataatsimiinneq 2005
Ullormut oqaluuserisassat kiisalu ullut suliarineqarfissaat
Aalajangiiffigisassatut siunnersuutit Naalakkersuisuniit UPA 05