FM05/75: Inuusuttut Inatsisartuisa ukiut tamaasa ukiumut ataasiarlutik ataatsimiittalernissaat pillugu Inatsisartut ...(Inatsisartunut ilaasortaq Anthon Frederiksen, Kattusseqatigiit)
6. marts 2005 UPA 2005/75
Inatsisartut Suleriaasianni § 32 naapertorlugu Inatsisartut aalajangiiffigisassaattut siunnersuut imaattoq matumuuna saqqummiuppara:
Inuusuttut Inatsisartuisa ukiut tamaasa ukiumut ataasiarlutik ataatsimiittalernissaat pillugu Inatsisartut aalajangiiffigisassaattut siunnersuut.
(Inatsisartunut ilaasortaq Anthon Frederiksen, Kattusseqatigiit)
Tunngavilersuut:
Inuusuttut Nunatta siunissaa pillugu aamma politikkikkut suli annerusumik peqataatinneqarnissaat Kattusseqatigiinni assut pingaartipparput, aamma nuannaarutigeqaarput inuu-suttut inatsisartui maannamut marloriarlutik ataatsimiisinneqarmata, tamannalumi inuiaqatigiinni aamma ajunngitsumik malugilluarneqarluni inuusuttortatsinnut tatiginninnerulernermik isumalluarnermillu suli annerusumik takutitsivoq ajunngilluinnartoq, aamma inuusuttut inatsisartuisa malinnaaffigineqarnerat inuiaqatigiinni assut soqutigineqartoq malunnarpoq.
Kattusseqatigiinni qularutiginngilarput inuusuttut inatsisartuisa aamma politikkikkut taamatut periarfissinneqarneq assut ilinniarfigalugulu aamma inuttut pissarsiaqarfigisaraat, minnerunngitsumik aamma politikkimut annerusumik soqutiginninnerulernermik tamanna nassataqartoq qularnanngilaq.
Taamaattumik inuusuttortatta suli politikkimut annerusumik soqutiginninnerulernissaat peqataanerulernissaallu anguniarlugu inuusuttut inatsisartuisa ukiut tamaasa ataatsimiisinneqartalernissaat matumuuna Kattusseqatigiit sinnerlugit siunnersuutigaara.