Ilanngussaq 1

Ilanngussaq 1

Inatsisartut Naalakkersuisullu pillugit inatsisartut inatsisaata iluarsaanneqarnissaanut suleqatigiisitaliamut suliassarititat

Inatsisartut suleqatigiissitaliussapput, taassuma Inatsisartut Naalakkersuisullu pillugit inatsisartut inatsisaata iluarsineqarnissaanut siunnersuut nassuiaatitalik suliarissallugu.

Suleqatigiissitaliap sulinermini tunngavigissavai isummat suliassallu makku:

Inatsisartut Naalakkersuisullu pillugit inatsisartut inatsisaat allannguutaalu 1979-imi namminersornerulluni oqartussaanermik aaqqissuussinerup atuutilerneraniilli Inatsisartut akuersissutigisimasaat tunngavigalugit Nunatsinni inatsisartoqarnermik aaqqissuussinerup ineriartornerata allaaserineqarnera suliarineqassaaq.

Pisimasunik aalajangersimasunik inatsisip maannakkut atuuttup ajornartorsiutitarisinnaasaanik takutitsisinnaasunik innersuussilluni inatsisartoqarnermik aaqqissuussineq, tamanna periarfissaqarpat,  nassuiarneqartariaqarpoq.

Suleqatigiissitaliap siunnersuutaa aallaaveqassaaq Inatsisartut Naalakkersuisullu pillugit inatsisartut inatsisaata nutaap inatsisartoqarnermi tunngavissanik (isummanik) nalinginnaasumik akuerisaasunik tunngaveqarnissaa.

Inatsisartut Naalakkersuisullu pillugit inatsisartut inatsisaata nutaap inuiaqatigiit aningaasaqarnikkut imminut napatittumik ineriartornissaat anguniarlugu ukiuni aggersuni misilittagassaat eqqarsaatigalugit Inatsisartut Naalakkersuisullu peqatigiillutik sunniuteqarluartumik ullutsinnullu naleqquttumik sulisinnaanissaannut ilapittuutaasinnaasumik sinaakkuteqarnissaa Suleqatigiissitaliap mianerissavaa. Tassunga ilanngullugu UPA 2004/51-imi, Inatsisartut Kukkunersiuinermut Ataatsimiititaliaanni ilaasortanit saqqummiunneqartumi, tunngavigineqartut suleqatigiissatamit sapinngisamik annertunerpaamik ilanngunneqarnissaat anguniarneqassaaq.

Inatsisartut Naalakkersuisullu pillugit inatsisartut inatsisissaannut nutaamut siunnersuummik nassuiaatitalimmik kingusinnerpaamik Inatsisartut 2005-imi ukiakkut ataatsimiinnerisa aallartinnerani inatsisartut siulittaasuannut naalakkersuisullu siulittaasuannut Suleqatigiissitaliaq tunniussissaaq.

Suleqatigiissitaliami ilaasortaapput Inatsisartut Allattoqarfianni atorfilittat marluk inatsisartut siulittaasuannit toqqarneqartut aammalu Naalakkersuisut Allattoqarfianni atorfilittat marluk naalakkersuisut siulittaasuannit toqqarneqartut.