Naalakkersuisunut apeqqutit

Ilaasortaq aamma periarfissaqarpoq pisortat susassaqarfiannut tunngasumik paasissutissanik, Naalakkersuisunut apeqquteqarnikkut, pissarsiniarsinnaalluni. Taamatut kissaateqarneq naatsumik allakkatut, tunngavilersugaalluni aalajangersimasumillu oqaasertalikkatut Inatsisartut siulittaasuannut, tunniunneqassaaq.

Tamatuma kingorna apeqquteqartoq allakkakkut Naalakkersuisunit akissuteqarfigineqassaaq, aammali qinnutigisinnaallugu apeqqutigisani oqaasiinnarmik saqqummiukkumallugu, Inatsisartullu ataatsimiittarfianni Naalakkersuisuniit oqaasiinnarmik akissutisilluni. Taamatut pisoqartillugu apeqquteqartoq Naalakkersuisullu kisimik oqaaseqarsinnaatitaapput, aatsaalli allatut pisoqarsinnaalluni ataatsimiinnermi aqutsisoq isumaqarpat pissutsit immikkut ittut pissutigalugit allat aamma oqaaseqarsinnaasut. Naalakkersuisunut apeqquteqarnermut atasumik aalajangiisoqarsinnaanngilaq. Inatsisartut suleriaasiannut ilanngutami piffissat oqaaseqarfiusinnaasut takuneqarsinnaapput, taakkulu atuullutik Naalakkersuisunut apeqqut oqaasiinnarmik saqqummiunneqarluni akissuteqarfigineqarpat.