VM06/45 Utoqqaat, innarluutillillu, kiisalu siusinaartumik sulisinnaajunnaarnersiutillit tigusartangaasa..(Anthon Frederiksen)
UKIU 2006/45
Inatsisartut Suleriaasianni § 32, imm. 1 naapertorlugu matumuuna aalajangiiffigisassatut siunnersuut imaattoq saqqummiuppara:
Utoqqaat, innarluutillillu, kiisalu siusinaartumik sulisinnaajunnaarnersiutillit tigusartangaasa naliginnaasumik akit qaffakkiartortarnerat malillugu qaffaaneqartalernissaat anguniarlugu Naalakkersuisut suliniuteqaqqullugit, inatsisartut aalajangiiffigisassaattut siunnersuut.
(Inatsisartunut ilaasortaq Anthon Frederiksen, Kattusseqatigiit)
Tunngavilersuut:
Ilisimaneqartutut inuit qulaani pineqartut ilaat ukiorpassuarni aningaasaqarnikkut annertuumik ajornartorsiuteqartarput, minnerunngitsumik utoqqalinersiutit, siusinaartumillu sulisinnaajunnaarnersiutit il.il. annertussusaasa ilaatigut ukiuni arlalinni qaffanneqaratik uninngatiinnarneqartarnerat pissutigalugu, aningaasat inunni taakkunani naleerukkiartornerat allanut naleqqiullugu sukkanerusarpoq, tassa akissarsiat aammalu pisiassat, ineqarnermut akiliutit, olie, atisassat il.il. ilami atortussat assigiinngitsut ukiut ingerlanerini qaffanneqaraluaraangataluunniit utoqqalinersiutit assigisaalu qaffanneqarneq ajorneri pissutigalugit inuit qulaani eqqartorneqartut allanut naleqqiullugit inuuniarnikkut angummanniapiloornerat ilungersunarnerulersartoq tusartuartarparput. Taamaattumik utoqqalinersiutit il.il. allatuulli akissarsiat qaffakkiartortarnerat malillugu qaffaaffigineqartalernissaat matumuuna Kattusseqatigiit partiat sinnerlugu siunnersuutigaara. Neriullunga inatsisartut paasinnittumik akuersaartumillu oqallilluarumaartut.