02EM/01.25.01-155 Naalakkersuisunut apeqqut: Nunaqarfinni inuussutissarsiornikkut periarfissat atorluarneqanngitsut atorluarumallugit iliuutsinik qanoq ittunik Naalakkersuisut... Mads Peter Grønvold
17. august 2002 UKA 2002/155
Kalaallit Nunaanni Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqqut: Nunaqarfinni inuussutissarsiornikkut periarfissat atorluarneqanngitsut atorluarumallugit iliuutsinik qanoq ittunik Naalakkersuisut aallartitsilersaarpat?
(Inatsisartuni ilaasortaq Mads Peter Grønvold, Kattusseqatigiit)
Ukiuni kingullerni sisamanngulersuni Inatsisartuni ilaasortatut nunaqarfinni innuttaasunik qinik-kanillu ataatsimiititsisarneq ingerlattarpara, nammineerlunga ilisimavara nunatsinni nunaqarfiit arlaqartut inuussutissarsiornikkut pitsaalluinnartumik periarfissaqaraluarlutik Naalakkersuinikkut periarfissinneqarsimanngitsut.
Nunatta nammineernerulernissaa eqqartorneqaleraangat Naalakkersuinikkut suliaqartut ilaannit oqaatigineqartarpoq nunatsinni nunaqarfiit amerlavallaartut, nunarpullu akissaqanngitsoq nunaqarfiit taama amerlatigisut aningaasalersorniassallugit.
Isumaqarpunga taamatut oqaluttarneq illuatungilerneqartariaqalertoq, nunaqarfinni inuussutissarsiornikkut periarfissaqartuni periarfissat atorluarneqartariaqalerput.
Assersuutigalugu nunatta ilaanni kujataani savaatillit inuussutissarsiornerat qiviaraanni aningaasarsiornikkut atukkat pitsaalluinnartut oqaatigineqarsinnaapput, tassa Naalakkersuinikkut pineqartuni inuussutissarsiornikkut ineriartorneq annertuumik tapersersorneqarmat.
Taamaliornikkut pineqartuni aningaasarsiorneq pitsaalluinnartumik ingerlanneqartarluni.
Nammineerlunga isumaqarpunga nunatsinni nunaqarfiit aamma allat taamatut periarfissaqartut, Naalakkersuinikkut pineqartut tapersersorneqarlutik periarfissinneqarsinnaagunik.
Nunarput nammineernerulissappat nunaqarfiit matoorneqartariaqanngillat, kisiannili nunarput nammineernerulissappat imminut pilersornerulersinnaaneq anguniarneqartariaqarpoq.
Tassa nunatsinni nammineerluni tunisassiat eqqarsaatigalugit, soorlumi nammineq nunap tuni-sassiai illersorlugit, Sanaartornikkut, Niuernikkullu, aatsaat taamaliornikkut nunap aningaasaqarnera nukittorsarneqarsinnaammat.
Illuatigut nunat allat imminnut suleqatigiinnerat ukiuni kingullerni sooq annertusiartuinnarpa?
Tassa Niuernikkut nukiit annertunerusut atorluarniarlugit.
Piffissanngunnginnerpa nunanik allanik suleqateqarluni nunatta ingerlanneqalernissa? Soorlumi EUROPA‑mi nunat suleqatigiit nukitsoriartuinnartut, naak uangut nunatsinni nammineerniasarinermut allaat nunaqarfiit matoorartariaqarlugit Naalakkersuinikkut suliaqartut ulluni kingullerni oqaaseqartalersut.
Isumaqarpunga Nunatta namminiilerniarnera taamatut ingerlanneqartariaqanngitsoq nunaqarfiit matoorarlugit, nunaqarfinni inuuniarneq inuussutissarsiornikkut aningaasarsiornikkullu ineriartortinneqarnissaat Naalakkersuinikkut periarfissinneqartariaqalerpoq.
Nunami nammineq tunisassiat innuttaasunit atorluarneqarpata aningaasarsiornikkut, inuussutissarsiornikkut, niuernikkut nuna pineqartoq nukitsoriartuinnarsinnaasoq nammineerlunga isuma-qarpunga, aningaasanik avammut annissuineq annertusiartuinnartoq, tunisassiassanik avammut annissuineq annertusiartuinnartoq, inunnik isumaginninnermut aningaasartuutit qaffakkaluttuinnartut, ila nunatsinni Naalakkersuinikkut suliaqartugut sumiippugut?
Qaa nunatsinni Naalakkersuinikkut suliaqartugut nunaqarfiit matoorarnagit pineqartuni inuuniarneq nukitsorsarneqarniarli, soorlumi aamma Illoqarfinni inuussutissarsiorneq nukitsorsarneqarsinnaasoq tunisassiorfinnik peqqissaartumik pilersaarusiornikkut sulineq uneqattaanngitsumik ingerlanneqarsinnaasunngorlugu ingerlatsinikkut.
Nunatsinni tunisassiat naammattut pigineqarput, inuussutissarsiornikkut, niuernikkullu aningaasaqarnikkullu suli pitsaanerusumik innuttaasunit atorluarneqarsinnaasut, inuit ataasiakkaanik nunatta pisuussutaat atornerlunneqartariaqanngitsut aamma isumaqarpunga.
Tassami nunatta pisuussutaat nunatsinni innuttaasut tamarmik atorluartariaqarpaat, suliffissaqartitsinikkut, niuernikkut, inuussutissarsiornikkut, aningaasarsiornikkullu.