03EM/01.25.01-114 Piniartut inuussutissarsiornikkut atugarisaasa qanoq pitsanngorsarneqarsinnaanerat pillugu apeqquteqaat aallaavigalugu .... (Inatsisartuni ilaasortaq Ole Thorleifsen, Siumut)
11. august 2003 UKA 2003/114
Inatsisartut suleriasianni § 35 naapertorlugu oqallisissiatut siunnersuut imaattoq matumuuna saqqummiuppara:
Piniartut inuussutissarsiornikkut atugarisaasa qanoq pitsanngorsarneqarsinnaanerat pillugu apeqquteqaat aallaavigalugu oqallinnissamik siunnersuut.
(Inatsisartuni ilaasortaq Ole Thorleifsen, Siumut)
Tunngavilersuut:
Ulllumikkut piniartutut inuussutissarsiorneq inuussutissarsiutit ilungersunarnersaraat. Inuussutissarsiutigalugu piniartuuneq pinngortitap allanngorarneranik eqqornerliorneqaraangami ajunaarnersuarmik kinguneqartarpoq, allatullu ajornartumik Namminersornerullutik Oqartussat piniartunut ataasiakkaanut tapiisariaqartarlutik.
Inuussutissarsiutit allat soorlu raajarniat, qaleralinniat, saattuarniallu ullutsinnut naleqqussaavigineqarnissaat anguniarlugu, aningaasarsiutaanerulernissaallu anguniarlugu ataatsimiisitalianik pilersitsivigineqarput, kisiannili piniartut inuussutissarsiutaat ataatsimiisitaliamik pilersitsivigineqanngillat.
Piniarnermik inuussutissarsiutillit saniatigooralugulu piniartut angallatitaarnissamut imaluunniit
piniutit akisunerit pissarsiariniarnerini annertunerusumik taperserneqartannginneri maannamut
ajornartorsiutaavoq suli aaqqiivigineqanngitsoq. Piniartut ukiumut aningaasarsiaasa appasinneri
tunngavigalugit aningaaseriviit taarsigassarsititsisinnaaneri killeqartorujussuuvoq, taamaattumillu angallatitaarniartarneq piniartumut ajornartorsiutaavoq annertooq.
Piniartut pisaat ilaqutariit iluini inuuniutaalluartartut, nunattalu sinnerani piumaneqaqisut qanormita kikkunnik tamanik pisiarineqarsinnaasunngorlugit siammarterneqarsinnaappat. Siornatigut siunertarissaaqalutik tunisassiorfiliorniat iluatsinngitsoortartut qunullerfigalugit siunnerfeqarata ingerlaannassanerpugut. Mattaguleraangatta aamma siunissami oqarasuaatikkut piniartumut pisiniartassanerpugut, ilisimallugu piniartup qilalugartaata akissarsissutaanera tassaasoq piniutiminik nutarteriniaruni pisiniutissatuaringaa.
Namminersortunngorsaanerup aqqani namminersortut nunatsinni sivisunerpaamik namminersortuusut naammanginartumik tapersersorneqarsimannginneri kialuunniit takusinnaavaa. Aaqqiivigineqarnissaat erseqqissumik siunnerfilimmik naatsorsuutigineqarsinnaasumillu pilersaarusiorfigineqarnissaat saneqqunneqarsinnaanngilaq.
Inuusuttut atuarfimmi atuarlutik ingerlaqqinngitsoortut nunatsinni amerlavallaarput, taakkuuppullu aamma piniarnermik inuussutissarsiuteqalersartut. Qanormita inuussutissarsiummik ilinniarneranni, piniutissanillu pissarsiniarneranni, pisaasalu tunitsivissaannik aalaakkaasunik Namminersornerullutik Oqartussaniit tapersersinnaavagut. Ilinniarfinniit sumiginnarneqarlutik misigisimasut qanormita tapersersorneqarnermik misigisimatilersinnaavagut.
Inuussutissarsiutip piniartuunerup nungulersutut sumiginnarneqarnera akueriuminaatsippara, isu-maqarpungalu inatsisartuni partiit inuussutissarsiummut piniartuunermut isummatik uani oqallinnermi erseqqissumik saqqummiuttariaqaraat, taamaalilluta inatsisartuni sulinitsinni piniartutut inuussutissarsiutilinnut tunngatillugu suna siunnerfigissanerlutigu isumannaassagatsigu.