04EM/01.25.01-53 "Kalaallit Nunaanni peqqinnissamik isumaginnittoqarfik pillugu inatsisip allanngortinneranik inatsimmut siunnersuut (peqqinnissaqarfik pillugu inatsisilianik...

4. august 2004                                                                                                   UKA 2004 / 53

Inatsisartut Suleriaasianni § 32 naapertorlugu aalajangiivigisassatut siunnersuut matumuuna Naalakkersuisut saqqummiuppaat:

"Kalaallit Nunaanni peqqinnissamik isumaginnittoqarfik pillugu inatsisip allanngortinneranik inatsimmut siunnersuut (peqqinnissaqarfik pillugu inatsisilianik unioqqutitsinermi pineqaatissiisarnerit)" pillugu Namminersornerullutik Oqartussat oqaaseqaataannut aalajangiivigisassatut siunnersuut.

(Ilaqutariinnermut Peqqissutsimullu Naalakkersuisoq)

Tunngavigineqartoq:

Peqqinnissaqarfimmut tunngasuni Namminersornerullutik Oqartussat pisinnaatitaaffii Kalaallit Nunaanni peqqinnissamik isumaginnittoqarfik pillugu danskit inatsisaanni (ulluinnarni ”oqartussaaffiginnilernermik inatsimmik” taaneqartartumi) 1. januar 1992-imi atuutilersumi annertunerusumik tunngavissinneqarput.

Oqartussaaffiginnilernermik inatsit peqqinnissamut tunngasut pillugit inatsisiliani nutaani pineqaatissiissuteqartitsinissamut killilerujussuarmik ullumikkut periarfissiivoq. Taamaalilluni peqqinnissaq pillugu inatsisit akiliisitaanermik arsaagaanermilluunniit taamaallaat pineqaatissiissutaasinnaapput, Kalaallit Nunaanni pinerluttulerinermi inatsit naapertorlugu pineqaatissinneqaataasinnaasut allatulluunniit eqqartuunneqaataasinnaasut ilisimaneqartut atuunnatik. Pissutsit taamaannerat peqqinnissamut tunngasuni inatsisinik iluarsaanissanik pisariaqartunik Namminersornerullutik Oqartussat naammassinninnissaannut killiliisorujussuuvoq.

Ajornartorsiut ilaatigut nakorsaatit pissassaatit inerteqqutaanerannut atasumik saqqummiunneqarsimavoq (tak. Nakorsaatit pissassaatitut atorneqartartut ilaasa inerteqqutaanerat pillugu Inatsisartut peqqussutaat nr. 7, 31. maj 2001-imeersoq), unioqqutitsineq akiliisitaanermik arsaagaanermilluunniit taamaallaat pineqaatissiissutaasinnaammat, danskilli inatsisaat taamaattoq ilaatigut parnaarussaanermik pillarneqarsinnaanermut tunngavissiilluni. Tamanna arlalinnit, soorlu  Kalaallit Nunaanni Politimesterimit aamma naalagaaffiup Kalaallit Nunaannilu sinniisuutitaanit, uparuarneqarsimavoq. Ajornartorsiut taamaattoq nappaatit tunillaassortut pillugit nutaamik inatsisiliornermi saqqummerpoq (tak. Nappaatit tunillaassortut akiorniarlugit iliuutsit pillugit Inatsisartut peqqussutaat nr. 20, 12. november 2001-imeersoq). Tamatumuuna ilaatigut Kalaallit Nunaanni Politimesteri kissaateqarpoq akiliisitaanermit sakkortunerusumik pineqaatissiisoqarsinnaanissaa periarfissaqartariaqartoq.

Peqqussutilli taakku marluk, oqartussaaffiginnilernermik inatsimmit killiligaasunik, pineqaatissinneqaataasinnaasunik aalajangersagartaqartillugit akuersissutigineqartariaqarsimapput. Tamatuma kingunereratarsinnaavaa inatsisip kissaatigineqartutut tamakkiisumik sunniuteqarsinnaannginnera, aammalu inatsisinik unioqqutitsinernut imaannaanngitsunut eqqartuussiviit naleqquttumik iliuuseqarsinnaannginnerat. Peqqinnissaq pillugu siunissami inatsisiliornermi taamatut pisoqaratarsinnaavoq.

Taamaattumik Peqqissutsimut Naalakkersuisoqarfik Indenrigs- aamma Sundhedsministeriamut saaffiginnissimavoq oqartussaaffiginnilernermut inatsisip allanngortinneqarnissaa kissaatigalugu, taamaalilluni taassuma Kalaallit Nunaanni pinerluttulerinermi inatsit (tak. inatsimmik nalunaarut nr. 49, 13. februar 1979-imeersoq kingorna allannguuteqartinneqartoq) naapertorlugu pineqaatissinneqarnermik allatulluunniit eqqartuunneqarnermik pineqaatissinneqaataasinnaalernissaa inatsisikkut tunngavissinneqarniassammat.

Indenrigs- aamma Sundhedsministeriap tamanna tunngavigalugu inatsisip allanngortinneqarnissaanut siunnersuut, peqqinnissaq pillugu nunami maani inatsisinik aalajangersaasinnaanissamik ujartorneqartumik periarfissiisussaq,  matumunnga ilanngunneqartoq suliarisimavaa.

Ministereqarfiup inatsisissamut missingiusiaata Inatsisartunit isumaqataaffigineqarnissaa Naalakkersuisut kissaatigaat.