04EM/01.25.01-103 Nunatta imartaani imaatigut angallannerup isumannaatsuunerata pitsaanerulersinneqarnissaa, taamaalillunilu... (Enos Lyberth, Siumut)
11 august 2004 UKA 2004/103
Inatsisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara:
Nunatta imartaani imaatigut angallannerup isumannaatsuunerata pitsaanerulersinneqarnissaa, taamaalillunilu imaani ajunaartarnerit pinaveersimatinneqarnissaat anguniarlugu Naalakkersuisut siunnerfilimmik suliniaqqullugit peqquneqarnissaannik Inatsisartut aalajangiiffigisassaattut siunnersuut
(Inatsisartunut ilaasortaq Enos Lyberth, Siumut)
Tunngavilersuut:
Ukiuni makkunani angallatit mikinerit nunatta sineriaani sinersorlutik angalasartut amerliartuinnarput, ajoraluartumillu ajunaarnerit amerlasuut pisarput. Kalaallit Nunaanni imaatigut angallannerup pitsanngorsaavigineqarnisaanik Naalakkersuisut sukumiisumik suliniuteqalernissaat siunnersuummik uannga saqqummiussininni kissaatigaara. Ilaatigut nalunaaqutsersuinikkut imaatigut angallannerup isumannaallisaavigineqarnissaa pisinnaavoq. Uani aqqutini nunap iluatigoortuni ikkarlunnillu pitsaanerusumik nalunaarsuinissaq immikkut eqqaarsaatigaakka. Ikkarluit pitsaanerusumik nalunaarsorneqarnerisa angallanneq isumannaannerulersillugulu imaatigut ajunaarnerit pinaveersaartissinnaagai isumaqarpunga.
Søfartsstyrelse, Farvandsvæseni aammalu qallunaat sakkutuui annertuumik pitsaaqisumillu nunatta imartaani aqqutinut aammalu nalunaaruteqartarnernut tunngasunik kiisalu inuiaqatigiinnut maleruagassanik atuuttunik ilitsersuutinillu suliaqartut nalunngilara. Farvandsvæseni imaani uuttortaanermik isumaginnittarpoq, puttaqutinik kisatilinnik ikkusuinermik isumaginnitarluni, puttaqutinik kisaatilinnik aserfallatsaaliinermik isumaginnittarluni aammalu Qallunaat Nunaataa Kalaallillu Nunaata imartaanni allatigut nalunaaqutsersuutinik isumaginnittuulluni. Saniatigullu sumiissusersiornermi atortorissaarutit soorlu DGPS-it ingerlanneqarneri isumagisarai. Kalaallit Nunaata imartaani imaatigut angallatit aqqutaannik nalunaaqutsersuineq nunatta oqartussaaffiginngimmagu, nunatsinni imaatigut angallannermi sillimaniarneq ataatsimut isigalugu pitsanngorsaavigineqarnissaa, minnerunngitsumillu nunatta imartaani nalunaaqutsersuinerit pitsanngorsaavigineqarnissaat siunertaralugu Naalakkersuisut danskit naalakkersuisuinik isumaqatiginninniassasut matuminnga siunnersuuteqarnikkut kissaatigaara.
Nunatsinni immami nalunaaqutsersuisoqassatillugu periarfissatigut arlalinnik ajornartorsiuteqartoqartartoq ilisimaarilluinnarpara. Sikorsuit, iliarsuit aammalu tinittarnerit ulittarnerillu annertuut nalaattagaraavut. Kalaallillu Nunaata isorartunerujussua aamma puigussanngilarput.
Imaatigut ajunaarnerit pinaveersaartinneqarnerannut nunatta imartaani nalunaaqutsersuinerit pitsanngorsarneqartuarnissaat pingaaruteqarluinnartuusoq isumaqarpunga. Aammattaaq isumaqarpunga ikkarlunnik aammalu imaatigut angallavinnik nalunaarsuinerit ingerlaavartumik pitsanngorsarneqartariaqartut, taamaalilluni taakku ajornanngitsumik eqaatsumillu, soorlu internetti aqqutigalugu, innuttaasunit nunatta sineriaani angalaartartunit tamanit imaasiallaannaq paasissutissanik angallavinnut tunngasunik aallerfigineqarsinnaanngornissaat sulissutigineqartariaqarpoq. Aammattaaq danskit kalaallillu oqartussaasuisa nunatsinnilu innuttaasut akornanni paasissutissanik paarlaasseqatigiittarnerit nukittorsaavigineqartariaqarnissaat pingaarluinnartuusutut isigaara. Kalaallit Nunaanni innuttaasut nunatta imartaanik ilisimasaat annertoorujussuuvoq, sulilu annertusartuarluni. Ilaatigut taamatut ilisimasaqarneq ajoraluartumik ajutoortoqarneranut atatillugu, soorlu ikkarlittoqarneratigut, suli annertunerulersarpoq. Taamatut ajutoornerit arlaleriarlutik pinnginnissaat siunertaralugu ilisimalikkap taassuma ingerlateqqinnissaa pingaarutilerujussuuvoq. Namminersornerullutik Oqartussat Kalaallit Nunaannilu kommunit nunatta imartaanik ilisimasaminnik danskit naalakkersuisuinut ingerlatiteqqikkusuttut qularutiginngilara, taamatullu iliorneq pitsaasumik suleqatigiinnissamut pinaveersaartitsiniarnermullu tunngaviulluassaaq.
Naalakkersuisut imaatigut angallannerup isumannaallisaavigineqaranut pitsanngoriaataasunik allanik suliniutissatut siunnersuutissaqarpata, tamanna qujarullugu oqallisigineqarsinnaavoq.
Taama oqaaseqarlunga siunnersuut Inatsisartunut oqallisigisassanngortippara.