04EM/01.25.01-130 Aalisarneq pillugu Inatsisartut inatsisaat nr. 18, 31. oktober 1996-imeersumi § 14 nr. 4 naapertorlugu... (Aqqalukasik Kanuthsen, Inuit Ataqatigiit)

12. august 2004       UKA 2004/130

Inatsisartut suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara:

Aalisarneq pillugu Inatsisartut inatsisaat nr. 18, 31. oktober 1996-imeersumi § 14 nr. 4 naapertorlugu pisarineqarsinnaasut qummut killinernagit piffissamut killeqanngitsumut akuersissutit ulloq 1. januar 2010-mit piffissamut killilerlugit atuutilersitsinissamik Naalakkersuisut peqquneqarnissaannik Inatsisartut aalajangiiffigisassaattut siunnersuut.

(Inatsisartunut ilaasortaq Aqqalukasik Kanuthsen, Inuit Ataqatigiit)

Tunngavilersuut:

Siunnersuut manna saqqummiuppara isumaqarama, inuiaqatigiit kalaallit raajanik aningaasarsiornermi aqutsinerup tigummileqqittariaqartut. Tassami ullutsinni imatut nunatsinni ataatsimoorluta pigisatsinnik aqutsinitsinni aaqqissuussisimavugut, aningaasarsiornikkut iluaquteqarsinnaaneq innuttaasut akornanni ikittuaraararsuarnut tunniussimallutigit ¿ annertunerusumik akilersinnagit.

Taamatut ataatsimoorluta pisuussutitta inuiaqatigiinnut iluaqutissanngorlugu aaqqiivigineqarsinnaagaluartoq, kilisaatinik ¿piginnittunut¿  kisiat annertunerusumik iluaqutissanngorlugit agguaaneqarsimapput. Pisassiissutinik ¿piginnittut¿ tunngavilersuutigissajunnarsivaat, taamatut pisuussutinik atuisinnaanertik pillugu raajanik akitsuusiisarneq aqqutigalugu inuiaqatigiinnut akiliuteqartarlutik.

Ukiuni qaangiuttuni kingulliunerusuni, raajat nillertumi pisarineqartartut akii annertuumik appariaateqarsimapput. Taamaattoq maluginiarneqanngitsoorsinnaanngilaq, raajat qalipaajarneqanngitsut akii 2004-p ingerlanerani appariartuaarsimammata, taamasilluni agguaqatigiissillugu akii massakkut kiilumut 13,- kr.-nit ataallugit annertussuseqalersimallutik, tamannami qummut qaangeraangamikku aatsaat akitsuuserneqalertarmata.

Nunatta pisuussutaasa aqunneqarnerat pillugu ilaatigut Benchmarking pillugu ataatsimiititaliamit nalilersuiffigineqarsimapput, soorlu nalilersuinerit naatsumik oqaatsigalugit imatut nalilerneqartarsimallutik:

Nunatsinni inuussutissarsiornikkut toqqammaveqarnerput imak aaqqissuussaavoq, naak inuussutissarsiornermi isertitat inuiaqatigiit ingerlanneqarneranni ikorfartuutaasussaagaluartut, illuatungaatigut inuiaqatigiit tassuunatigut isertitaqangaanngikkaluarlutik inuussutissarsiutinut assigiinngitsunut annikigisassaanngitsumik tapiissuteqartarmata.

Aalisarnikkut pisassiissutit utertitsissutigineqarsinnaasut, soorlu ukiut 5-7-t siumut kalerriuteqareernikkut, tamannalu inatsisit toqqammaviusut innersuussutigalugit ajornartorsiutaanavianngitsoq, taarsiissuteqanngitsumik aaqqiivigitissallugu.

Taamaattumik matumuuna Inatsisartuni ilaasortat kajumissaassavakka, inuiaqatigiit nunatta pisuussutaanik iluaquteqarnerminni, annertunerusumik iluaquserneqaratik ingerlalersimanerat allanngortinniarlugu akuersaassagaat, aalisakkanik minnerunngitsumillu raajanik pisassiissutit eqqarsaatigalugit ukioq 2010 aallarnerfigalugu, ukiuni siumut aalajangereersimasuni kisiat tunniunneqartalissasut, aammalu pisassiissutit ingerlateqqinneqassappata tamatigut Naalakkersuisut qulakkeertassagaat, siumut killiliilluni pisassiissutigineqarsimasut aalajangersakkat matumani pineqartut aallaavigalugit aaqqiivigineqarsimappata aatsaat pisassiissutigineqarsinnaassassasut.