04EM/01.25.01-82 Angallammik pisinermut atatillugu angallammut akuersissutigineqartutut amerlassusilinnik puttaqutinik... (Isak Davidsen, Siumut)

28. juli 2004 UKA 2004/82

Inatsisartut suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara.

Angallammik pisinermut atatillugu angallammut akuersissutigineqartutut amerlassusilinnik puttaqutinik atisartakkanik peqartoqarnissaanik aammalu umiatsiaaqqani angallatinilu sunngiffimmi atorneqartartuni puttaqutinik atisartakkanik atuinissamut pisussaaffeqalernissamik Naalakkersuisut sulissuteqaqqullugit peqquneqarnissaannik Inatsisartut aalajangiiffigisassaattut siunnersuut.

(Inatsisartunut ilaasortaq Isak Davidsen, Siumut)

Tunngavilersuut:

Nunatsinni ukiuni makkunani tusarsaaleraluttuinnarpoq imaatigut angallannermi pingaartumik umiatsiaaqqanik kiisalu nuannaariartaatinik angallateqartuni imaatigut ajunaarnerit toqumik kinguneqartut.

Inuiaqatigiit kalaallit eqqarsartariaqalerpugut, imaatigullu peqqussutinik sukaterisariaqalerluta, ukiumummi amerlapput imaatigut ajunaarnikkut toqukkut peeruttut.

Pisariaqarluinnalerpoq imaatigut angallannermi ersarissunik inatsiseqalernissarput, kikkulluunniit imaatigut angalaniartut, umiatsiaaqqanik angallatillu nuannaariartaatinik, pinngitsooratik puttaqutinik atisartakkanik atortoqartariaqartut.

Tamatumani pinngitsoorneqarsinnaavoq immakkut navianartorsiulernermi ajunaarnissaq, puttaqutimmi atisartakkat ukiuni makkunani pitsaaneruleraluttuinnarput, aammalu eqqarsaatigineqartariaqalerpoq imaatigut ajunaarnikkut nanineqanngitsoortartut ukiuni makkuna amerlammata suli.

Naak qularnaarneqarsinnaanngikkaluarpat imaatigut ajunaarnermi puttaqutip inuuneq ingerlatiinnarsinnaagaa, taamaattoq pingaarluinnarpoq puttaqutit atisartakkat pinngitsooratik atorneqarnissaat, tamatumami annikillilersinnaammagu imaatigut angallannermi ajunaarnikkut timit nassaarineqaratik periarfeerunneqartarnerat.

Taamaattumik Inatsisartut eqqarsarluarluta Naalakkersuisut Søfartstyrelsip sillimaniarnermut maleruaqqusaanik sukaterinissaannik peqqusariaqalerpagut.

&nbs