04EM/01.25.01-22 Inatsisartuni Naalakkersuisunilu ilaasortat il.il. aningaasarsiaqartitaanerat il.il. pillugit Inatsisartut inatsisaata allannguutaatut Inatsisartut inatsisaannut siunnersuut.
Ulloq 4. august 2004 UKA 2004/22
Inatsisartuni Naalakkersuisunilu ilaasortat il.il. aningaasarsiaqartitaanerat il.il. pillugit Inatsisartut inatsisaata allannguutaatut Inatsisartut inatsisaannut siunnersuut.
(Naalakkersuisut siulittaasuata akeqanngitsumik ineqarsinnaatitaanerata assigisaasalu atorunnaarsinneqarnerat)
§ 1
Inatsisartuni Naalakkersuisunilu il.il. ilaasortat aningaasarsiaqartitaanerat il.il. pillugit Inatsisartut inatsisaanni nr. 22-mi 18. december 2003-meersumi makkua allannguutigitinneqarput:
1. § 1-mi, imm. 1-mi 3-milu,”AK” imatut allanngortinneqarpoq: ”AS-G”.
2. § 1-imi imm. 4-p kingornagut nutaamik ivertinneqarpoq:
”Imm. 5. Imm. 4 naapertorlugu Inatsisartunut ilaasortat ineqartussaatitaanerata naammassinissaanut Naalakkersuisut inissianik arlaqartunik, Naalakkersuisut Inatsisartullu akornanni isumaqatigiissuteqarnikkut atugassanngortinneqartussanik inniminniisinnaapput.”.
Imm. 5 aamma 6 tamatuma kingornagut imm. 6-inngorlutillu 7-inngorput.
3. § 6, imm. 5, imatut oqaasertaliorneqarpoq:
”Imm. 5. Inatsisartut siulittaasuat akeqanngitsumik ineqassaaq. Naalakkersuisut siulittaasuannut Naalakkersuisunilu ilaasortanut allanut atorfimmut atatillugu ineqartitsineqassaaq, Namminersornerullutik Oqartussat atorfimmut atasumik inissiaataanni inigineqartussaatitaasuni ineqarnermut akiliutip naatsorsorneqartarneranut malittarisassat sukkulluunniit atuuttut malillugit ineqarneq akilerneqartassalluni.”.
4. § 6, imm. 6, imatut oqaasertaliorneqarpoq:
”Imm. 6. Inatsisartut siulittaasuata Inatsisartunut siulittaasuujunnaarnerminut atatillugu akeqanngitsumik inigisani qimassavaa. Inissiat, Naalakkersuisut siulittaasuannut Naalakkersuisunilu ilaasortanut allanut atugassanngortinneqartut Naalakkersuisut siulittaasuujunnaarnermut naalakkersuisunilu ilaasortaajunnaarnermut atatillugu qimanneqassapput.”.
§ 2
Inatsisartut inatsisaat 1. januar 2005 atuutilerpoq.
Namminersornerullutik Oqartussat, ulloq xx.xx. 2004
Hans Enoksen
/
Kaj Kleist