04EM/01.25.01-100 Ilaqutariinnut katsorsaavinnik angalasartutullu ilaqutariinnut siunnersuisarfimmik pilersitsinissamut iliuusissatut... (Enos Lyberth, Siumut)
9. august 2004 UKA 2004/100
Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.
Ilaqutariinnut katsorsaavinnik angalasartutullu ilaqutariinnut siunnersuisarfimmik pilersitsinissamut iliuusissatut pilersaaruteqartoqarsinnanera pillugu Naalakkersuisunut apeqqut.
(Inatsisartunut ilaasortaq Enos Lyberth, Siumut)
Tunngavilersuut:
Ilaqutariit ukiorimmassuk apeqqutit uku aqqutigalugit ¿ilaqutariinneq¿ sammineqarnissaa kissaatigaara.
Ilaqutariinnut katsorsaaviit
Avannaanut ¿ Kujataanut ¿ Tunumullu paasisassarsiorluni angalanermi maluginiarpara ilaqutariinnut katsorsaavinnik assut pisariaqartitsisoqartoq.
Taamaattumik makku paasissutissiissutigineqarnissaat kissaatigaara:
- Ilaqutariinnut katsorsaavinnik, illoqarfikkaartumik, nunap immikkoortuinut imaluunniit nuna tamakkerlugu pilersitsinissamut iliuusissatut pilersaarummik Naalakkersuisut peqarnersut.
- Ilaqutariinnut højskolinik katsorsaanermut neqeroorutitalinnik nunatsinni højskolit suleqatigalugit Naalakkersuisut neqerooruteqalersaarnersut, soorlu ukioq 2002-mi misiligutitut Sulisartut Højskoliata Ilaqutariinnermullu Pisortaqarfiup ingerlassimasaattut ittumik.
Matumani qanoq ilusilimmik ilaqutariinnermut højskoli allanngortinneqassanersoq, qanoq aningaasalersorneqassanersoq kikkunnullu sammitillugu pilersaarusiorneqassanersoq Naalakkersuisut naalakkersuinikkut isummerfigisimaneraat ilanngullugu paasissutissiissutigineqassasoq kissaatigineqarpoq.
Ilaqutariinnut siunnersorti angalasoq
Nunatsinni kommunini nunap immikkoortuini nunamullu tamarmut sammititamik ilaqutariinnut siunnersuinermik pitsaasumik misilittagaqarpugut. Isumaqarpunga misilittakkat pitsaasut atorluarneqartariaqartut, siunnersuisaarneq ilaqutariinnut ikiorneqarnissaminnut pisariaqartitsisunut annertuumik iluaqutaanera siunertamullu taassumunnga ilinniarsimasunik sulisoqarnerput pissutigalugu.
Taamaattumik uuma paasissutissiisutigineqarnissaa kissaatigaara:
- Kommunimit kommunimut angalalluni ikiorsiisinnaasumik pisariaqartitsinerlu naapertorlugu ilaqutariinnut siunnersuisinnaasumik Naalakkersuisut pilersitsilersaarpat. <