04EM/01.25.01-118 Illoqarfinnut anginernut annertunerusumik nussulernissaq pissagaluarpat assigiimmik akeqartitsinerup... (Marie Fleicher, Demokraatit)

13. august 2004 UKA2004/118

Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.

Naalakkersuisunut apeqqut: Illoqarfinnut anginernut annertunerusumik nussulernissaq pissagaluarpat assigiimmik akeqartitsinerup atorunnaarsinneqarnissaata oqallisigineqareernissaa aalajangiivigineqarnissaalu sioqqullugit inissianut meeqqanillu paaqqinninnermik aaqqissuussinernut utaqqisutut allatsissimasut ikilisinneqarnissaat taamatullu attaveqaqatigiinnermut tunngatillugu allatigut aningaasaliinernik suliniutinillu siumut isigisunik aallartitsisoqarsimava?

(Inatsisartunut ilaasortaq Marie Fleicher, Demokraatit)

Tunngavilersuut:

Naluneqanngitsutut illoqarfitsinni annerusuni kallerup inneranut imermullu akit akiviusut atuupput, piviusut, appasissut ajoraluartumilli takeqeqisunik utaqqisutut allattorsimaffinnik nalunaarsorsimasorpassuaqarlutik.

Assersuutigalugu ullumikkut Nuummi ukiut 13-it angullugit inissiamik utaqqisut allattorsimaffianiittoqartarpoq.

Taamatuttaaq meeraaqqerivinni meeqqerivinnilu inissat ukiut arlallit utaqqineqartartut naluneqan-ngilaq. Aammalumi meeqqaat atuarfiisa isikkui tigusinnaasaalu tamaallutik.

Ajornartorsiutaasinnaasut amerlagaluaqaat, isumaqanngilangali tamakku ersersinneqarsinnaasut assigiimmik akeqartitsineq atorunnaarsinneqarsinnagu. Assersuutigalugu:

¿Illoqarfinnut akikitsunut¿ nuunnissamik toqqaasut sumi najugaqassappat?

Illoqarfinnut akikitsunut nuunnissamik toqqaasut suliffissaqartinneqarumaarpat?

Taavami meeqqatik paarsisussaqartissavaat?

Annertunerusumik ilinniagaqalernissamut neqeroorfigineqassappat? Taamaattoqassappat sunik?

G-50-eqarnerata G-60-eqarneratalu nalaani ilaqutariippassuit illoqarfinnut annerusunut suliumallutik nutsernikuupput. Taamanikkut qitiusumiik atorfissaqartinneqartut isumagineqarput.

Nutsertut ilaatigut inissaannik tunineqartarput.

Sulinissamut periarfissaqarsimallutillu meeqqamik paaritinnissaannut periarfissaqarsimapput.

Tamakku pigineqaraluartut takussutissaqarpoq, suliniutit taaneqartut oqaluttuarisaanikkut kulturikkullu qanoq annertutigisumik inuttut pilliuteqartoqarsimatigisoq.

Soorunami allanngornerni misigisimasat amerlasoorpassuarnit qaangerneqartarput kisinannili taakkunannga qaanngiisimanngitsut amerlaqaat suli.

Sukkavallaamik ingerlanneqarsimanerpa?

Tamanna pissutaalluni inuiaqatigiit iluanni amerlaqisut ilivitsuunngitsutut ullumikkut misigisimappat?

Tamanna pissutaalluni inuiaqatigiit iluanni ullumikkutut taama annertutigisumik inuttut ajornartorsiortoqarpa?

Piginneqatigiilluni illuliornermut sulisorisanullu inissiat ilaat siuarsaaffigineqarnissaannut ilaatigut annertuumik aningaasanik immikkoortitsisoqarsimasoq 2005-imut aningaasanut inatsisissatut siunnersuummi takuneqarsinnaavoq.

Tamanna tusarlugu iluarinarsinnaavoq. Kisianni illoqarfinni/nunaqarfinni najugaqartut qassit assigiimmik akeqartitsinerup atorunnaarsinneqarnerata kingunerisaanik taama aaqqissuussinernut akissaqarpat?

Illoqarfinnut piorsaaffiusutut taaneqartartunut tamakku angalanissaannut qitiusumit neqeroorfigisariaqassagunarpavut.

Aammaarluguli, sumimi najugaqassappat?

Sumi sulissappat?

Meeqqat sumi paarineqassappat? ¿ ajornartorsiutit ataasiakkat pillugit aperinerinnaavoq.

Apeqqutit taama isikkullit Naalakkersuisunit tatiginartumik tamakkisumillu akissuteqarfigineqarsinnaappat?

Piumasariumavara taakku ammasumik unneqqarissumillu akineqassasut.

Taamaattoqanngippat, allannguinissap siuliani taaneqartup piviusunngortinnissaanut inuiaqatigiiusugut akissaqarpugut? Isumaqarluinnarpunga ¿naamik¿!.

Ukiuni tulliuttuni suli amerlasuuni aalajangiisuusunik aalajangiisariaqartartussaassasugut qularutissaanngilaq AAMMA nuannarineqanngitsunik kisiannili pisariaqavissunik.

Ammalu assigiimmik akeqartitsinerup atorunnaarsinneqarnera inuiaqatigiit aningaasaqarnikkut pisariaqartumik, ullumikkut uninngaannarsorinarlumut immaqalu ukiuni arlalissuarni inuiaqatigiiusugut naalakkersuinikkut ajoqisumik aqunneqarnikuunitsinnit patsiseqarunartumut, iluaqusiisinnaasoq qularutissaanngilaq.

Illuatungaatigulli inuiaqatigiinnut sunniuteqartussatut kissaatigineqartoq periutsip ilusiligaanerata taassuma kisimi pilersissinnaanngikkaa qularutiginngilara. Assigiimmik akeqartitsinerup atorunnaarsinneqarnerata malitsigisaanik allaanerusumik najugassarsiortoqartalernissaa pillugu ersarissumik malinnaavigineqarsinnaanngippat, akinik piviusunik atuutsitsilernissaq akisoorujussuanngorsinnaavoq, inuiaqatigiinnut iluarsiuminaatsunik akornusiilluni.

Taamaalillunilu suliniutinut allanut tamanna taputartuunneqartussaavoq, soorlu akileraartarnerup allanngortiteriffigineranut ¿ kisiannili aamma isumaliutigilluakkamik toqqissisimasumik tikerartarfiusinnaasut pilersaarusiorneqarnerisigut, taamaalilluni inuiaqatigiinni sanngiinnerusut annertuallaamik pilliuteqannginnissaat qulakkeerneqarsinnaaniassammat.

Aningaasaqarnermut tunngassutilinnik eqqarsartaaseqarneq pitsaaquteqarsinnaavoq kisianni inunnut kinguneqaatigisinnaasaat qaquguluunniit puigussanngilagut. Inuiaqataasummi tamavimmik inuiaqatigiit ineriartornerannik kivitsisuusussaapput.