04EM/01.25.01-124 Meeqqat atuarfianni meeqqat piginnaasamikkut sukkasuumik siuariartortut ilikkagaqarnerulernissaat siunertaralugu... (Doris Jakobsen, Siumut)

13. august 2004       UKA 2004/124

Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.

Naalakkersuisunut apeqqut: Meeqqat atuarfianni meeqqat piginnaasamikkut sukkasuumik siuariartortut ilikkagaqarnerulernissaat siunertaralugu immikkut neqeroorfigineqarsinnaanerat Naalakkersuisunit eqqarsaatersuutigineqarsimava?

(Inatsisartunut ilaasortaq Doris Jakobsen, Siumut)

Tunngavilersuut:

Meeqqat assigiinngitsutigut piginnaaneqarluartut tapersersorneqarluaraangamik suli sukkanerusumik siuariartortarput ilikkarusunnerannullu piumassusaat annertusiartuinnartarluni.

Taamaattumik pingaaruteqarpoq meeqqat ilikkagaqarusunnermut piumassuseqarluartut sapinngisamik kaammattorneqarlutillu piumassusaat najoqqutaralugu siuariartortinneqarnissaat.

Maannakkulli meeqqat atuarfianni ingerlatsinerput imaappoq, amerlanertigut meeraq piumassuseqarluartoq tapersersorneqaraluarluni atuaqatini ingiaqatigisariaqarmagit unikaallassimatinneqartarpoq ilaatigut periikkaminnik utikaajaarsinnerisigut.

Ilisimasakka naapertorlugit meeqqat atuarfiini meeqqat taamaattut, atuakkatigut assigiinngitsutigullu piginnaaneqarluartut siuariartornissaminnullu kajumissuseqarluartut amerliartuinnarput tapersersorneqartariaqarlutillu.

Taamaattumik isumaqarpunga meeqqat atuarfianni aammalu Atuarfitsialaap ingerlanneqarnerani meeqqat taamatut piginnaaneqartut siuariartornissaannut periarfissaasa inerisaqqinneqarnissaat anguniarneqartariaqartoq. Taama iliornikkut meeqqat piumassusaat suli annertusarneqassaaq aammalu Atuarfitsialaap ineriartortinneqarneranut ilapittuutaaginnassalluni.

Taamaalillunga Inatsisartut Suleriaasianni § 36 naapertorlugu apeqqut matumuuna saqqummiuppara.