04EM/01.25.01-132 Nunatta, Danmarkip USA-llu akornanni Igalikumi 6. august 2004 isumaqatigiissuteqartoqarnerata kingorna nunatsinni... (Kuupik Kleist, Inuit Ataqatigiit)

12. august 2004       UKA 2004/132

Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.

Naalakkersuisunut apeqqut: Nunatta, Danmarkip USA-llu akornanni Igalikumi 6. august 2004 isumaqatigiissuteqartoqarnerata kingorna nunatsinni avatangiisit USA-p sakkutooqarfeqarsimanerata kinguneranik mingutsinneqarsimasut salinneqarnissaat qulakkeerumallugu Naalakkersuisut qanoq iliuuseqalersaarpat?

(Inatsisartunut ilaasortaq Kuupik Kleist, Inuit Ataqatigiit)

Tunngavilersuut:

Pingaartumik ukiuni kingullerni ilisimalersimavarput nunatsinni sinerissami, sermersuarmi, inoqarfinni inulaarsuarnilu nunaminertat amerlasoorpassuit atortukunik assigiingitsunik qimatsiffigineqarsimallutillu mingutsinneqarsimasut.

Aamma ilisimavarput pineqartut sapinngisamik tamarmik nalunaarsorneqarsimalersut, naak sunik eqqaavigineqarsimanersut qimatsivigineqarsimasullu suli tamakkiisumik ilisimanngikkaluarlutigu.

Apeqquteqaateqarninni ilanngullugit makku paaserusuppakka:

Qimatat eqqakkallu suunersut tamakkiisumik paasiumallugit Naalakkersuisut qanoq ilior-niarpat?

Igalikumi 6. august 2004 isumaqatigiissut naapertorlugu suliassap naammassineqarnissaanut nunat isumaqatigiissuteqartut suleqatigiinnissaannut periarfissat qanoq ippat?

Amerikarmiut sakkutooqarfeqarnerisa kinguneranik mingutsitat aaqqissuussamik salinneqalernissaat pillugu qanoq pilersaarusiortoqarpa? 

Saliisoqarnissaani kikkut sulisorineqarsinnaanerat kikkullu akiliisussaatitaanissaat pillugit Naalakkersuisut sunik eqqarsaatersuuteqarpat.

&nbs