04EM/01.25.01-144 Kalaallit Nunaanni innuttaasut nunani allani aallaaniarsinnaanissaat eqqarsaatigalugu nunani tamalaani... (Per Berthelsen, Demokraatit)
13. august 2004 UKA 2004/144
Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.
Naalakkersuisunut apeqqut: Kalaallit Nunaanni innuttaasut nunani allani aallaaniarsinnaanissaat eqqarsaatigalugu nunani tamalaani atorneqarsinnaasumik aallaaniarsinnaanermut aallaaseqarsinnaanermullu akuersissummik pissarsisinnaalernissaat Naalakkersuisunit sulissutigineqalersaarpa?
(Inatsisartunut ilaasortaq Per Berthelsen, Demokraatit)
Tunngavilersuut:
Nunami allamiut aallaaniat Kalaallit Nunaannut piniariarnissamik soqutiginninnerat ukiuni kingullerni malugisarparput. Umimmaat tuttullu tammajuitsussatut piniassallugit nunami allamiut aallaaniat ingammik soqutigivaat aammali puisinniartarnermi alutornaatit ilungersunaatillu nunarsuarmiut maluginialersimavaat. Tamannalumi peqqutissaqarluarpoq, tassami Kalaallit Nunaat immikkuullarissunik misigisaqarfiusinnaasunik neqeroorutissaqarmat. Paasissutissinneqarnera naapertorlugu aallaaniat taakku namminneq piniarnermut sakkutik nunamut maanga ajornaquteqanngitsumik nassarsinnaasarsimavaat. Taamaassaarlu!
Illuatungaatigulli ilisimavara Kalaallit Nunaanni innuttaasut nunani allani piniarumallutik kissaateqaraangamik aporfiusinnaasunik naammattuisarsimasut, taamannaluuna pissutigalugu ajornartorsiut una saqqummiukkiga.
Nunani maani innuttaasut piniarnermut aallaaseqarnissamullu piginnaatitsissummik akerlileruminaatsumik amigaateqarput. Inuussutissarsiutigalugu tapertaralugulu piniartunut piniarsinnaanermut allagartanik peqarpugut. Uppernarsaatit taakku kalaallisut qallunaasullu allataapput Europami, Afrikami, Amerikami Asiamiluunniit atorneqarsinnaanatik.
Kalaallit Nunaanni innuttaasut nunani allani piniarsinnaanissaat eqqarsaatigalugu nunani tamalaani atorneqarsinnaasumik piniarsinnaanermut aallaaseqarsinnaanermullu piginnaatitsissummik pissarsisinnaalernissaat Naalakkersuisunit sulissutigineqalersaarpa?