04EM/01.25.01-67 Danmarkimi kalaallit taakkulu meerartaasa kalaallit oqaasiinik oqaasersianik atuartitsinermut atatillugu atuartinneqartarnerat... (Doris Jakobsen, Siumut)
16. juli 2004 UKA 2004/67
Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoqmatumuuna saqqummiuppara.
Danmarkimi kalaallit taakkulu meerartaasa kalaallit oqaasiinik oqaasersianik atuartitsinermut atatillugu atuartinneqartarnerat pillugu Naalakkersuisunut apeqqut.
(Inatsisartunut ilaasortaq Doris Jakobsen, Siumut)
Tunngavilersuut:
Inatsisartut 2003-mi ukiakkut ataatsimiinneranni Danmarkimi kalaallit oqaasiinik atuartitsinermut atatillugu ilinniartitsisunik amigaateqarneq pillugu ajornartorsiutit aaqqiivigineqarnissaannut aammalu Danmarkimi kalaallit oqaasiinik atuartitsinerup inerisarneqarnissaannut Naalakkersuisut qanoq pilersaaruteqarnersut apeqquteqaateqarpunga.
Naalakkersuisut akissuteqaataanni ersarilluartumik maannakkumut inissisimaneq aammalu Naalakkersuisut Danmarkimi suliniutaat nassuiaatigineqarput.
Naalakkersuisut akissuteqaataat naapertorlugu Danmarkimi atuartitsinermik neqeroorutit nukittorsarneqarnissaannut periarfissat assigiinngitsut misissorneqarnissaannik Naalakkersuisut misissuilersaarnerat aammalu ajornartorsiutinut Naalakkersuisut eqqummaariffiginninnerat nuannaarutigigakku oqaatigissavara.
Apeqquteqaatinnut Naalakkersuisut akissuteqaataanni ersersinneqarpoq Danmarkimi kalaallit oqaasiinik atuartitsineq ilinniartitsisussaqarneq, ilinniarusuttut amerlassusaat periarfissaqarnerlu tunngavigalugit ingerlanneqartoq.
Kalaallilli oqaasiinik ilinniarumallutik saaffiginnittartut ikittuinnaaneri ajuusaarnartuutippara, nalunnginnakkumi ilinniartut arlallit meeraqartut taakkulu kalaallisut ilinniartinneqarnissaat pingaaruteqartoq.
1) Taamaattumik ilinniagaqartut taakkulu meeraasa Danmarkimi kalaallisut atuartinneqartarnerisa nukittorsaavigineqarnissaat pillugu UKA03-mi apeqqutinnut Naalakkersuisut akissumminni iliuusissatut pilersaarut taasaat sumut killinnersoq apeqqutigissavara
Akissuteqaammi atuartussat 12-t allatsissimappata kommunalbestyrelseit nammineq oqaaserisanik atuartitsinissaminnut pisussaatitaasut allassimavoq.
Taamaattoq kalaallit meerartaat kalaallisut oqalussinnaajunaarsimasut imaluunniit kalaallit meerartaat kalaallisut ilinniarsimanngisaannartut Danmarkimi kalaallisut atuartinneqarnissaminnut periarfissaqannginnerat tikkuaavigissavara. Kalaallisut atuartitsinissamik neqeroorutit ilitsoqqussamik kalaallisut oqaasilinnut sammititaapput.
2) Kalaallit meerartaat ilitsoqqussaralugu kalaallisut oqaaseqanngitsut taamaattumillu bekendtgørelse nr. 870 ulloq 21. oktober 2002-meersoq naapertorlugu
atuartitsinissamut neqeroorutini ilaatinneqanngitsut pillugit ajornartorsiutit aaqqissuteqarfiginiarlugit naalakkersuisut qanoq iliuuseqalersaarpat?
Ullormut oqaluuserisassat kiisalu ullut suliarineqarfissaat