04EM/01.25.01-73 Nunatsinni nunaateqarneq naggorissaatit toqunartullu atornagit ingerlanneqarpa? Taamaassimanngippat; nunatsinni nunaateqarnerup... (Palle Christiansen, Demokraatit)

26. juli 2004 UKA 2004/73

Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.

Naalakkersuisunut apeqqut: Nunatsinni nunaateqarneq naggorissaatit toqunartullu atornagit ingerlanneqarpa? Taamaassimanngippat; nunatsinni nunaateqarnerup naggorissaatit toqunartullu atornagit ingerlanneqalernissaa Naalakkersuisut sulissutiginiarpaat?

(Inatsisartunut ilaasortaq Palle Christiansen, Demokraatit)

Tunngavilersuut:

Nunatsinni nerisassanik ¿ kalaallit nerisassiaannik,  nammineerluni pisanuinnaq tunngatinnagu, aammali ullumikkut namineerluta nunaateqarnikkut tunisassianik, nammineerluta pilersornissarput qangaaniilli ileqqoraarput annertuumik soqutigalugulu illersussallugu.

Nunatta Kujataani ukiuni amerlasuunngortuni nunaateqarfiit mikisut 60 missaannik amerlassusillit, savaateqarneq salliullugu naatitanillu annertungaatsiartumik annertussusilinnik aallussiviit, pilersinneqarsimapput. Aammattaaq Kalaallit Nunaata Kujataani marlussunni tuttuuteqarnermik ingerlatsisoqarpoq. Taakkualu saniatigut Upernaviarsummi, siunnersuinermik ingerlataqarfiusumik nunaatillillu allanik nutaanillu tunisassiornerat misiligarneqarsinnaaqqullugu nunalerinikkut misileraanernik nunatsinni ingerlatsisoqarpoq. 2003-mut ukiumoortumik kisitsisitigut paasissutissani takuneqarsinnaavoq nunamernit annertusiartuinnartut ¿ assallatserneqarlutik naatitsivigineqartalersut.

Naalakkersuisut qinnuigineqarput nassuiaatigissagaat nunatsinni nunaateqarneq noggorissaatit toqunartullu atornagit ingerlanneqartumik tunisassiorfiunersoq? Taamaattoqarsimanngippat eqqoqqissaartumik nassuiaqquneqarpoq Kalaallit Nunaat akuerisaasumik naggorissaatit toqunartullu atornagit tunisassiornermit sukkut immikkooruteqarnersoq, naggataatigullu; nunatsinni nunaateqarneq naggorissaatit toqunartullu atornagit ingerlanneqaleqqullugu Naalakkersuisut sulissuteqarniarnersut?

Taamatut apeqquteqarnikkut Kalaallit Nunaanni inuussutissanik naggorisaatit toqunartullu atornagit tunisassiarineqartut eqqarsaatigalugit inuiaqatigiinni nunatsinniittuni tunngaviusumik isummersorfiusumik oqallinnermik ammaassisoqarnissaa eqqarsaatigineqarpoq, naatsorsuutigineqarporlu Naalakkersuisut naalakkersuinikkut isummernerata saniatigut Kalaallit Nunaanni naggorissaatit toqunartullu atornagit nunaateqarnermut tunngatillugu akissuteqaat minnerpaamik ukununnga tunngasumik imaqassasoq:

• aningaasaqarnermut tunngasut
• inuussutissalerinermut tunngasut
• avatangiisinut tunngasut
• niuernermut tunngassut (nunatsinni nunalerinikkut tunisassiat naggorissaatinik toqunartunillu akuugaanngitsutut pitsaassutsikkut nalunaaqutikkat)

Apeqquteqartup kissaatiginngilaa piniakkanit tunisassiat nunatsinneersut nersualaarneqarnerannik taakkununngalu atatillugu ajornartorsiutinik, aammalu nunatsinni nunalerinermit tunisassiornermut allatigut aningaasanik tapiissuteqartarnerup itisilerissutaasumik misissuiffigeqqissaarneqarneranik akissut imaqassasoq, tamakkumi apeqqutinut aalajangersimasumut attuumassuteqanngimmata. Akerlianik apeqquteqartup kissaatigaa inuussutissanut avataanit eqqussukkanut tunngatillugu naggorisaatit toqunartullu akoorutiginagit periaaseqarnissamut tunngatillugu Naalakkersuisut isumaliutersuutaannik imaqartinneqassasoq. Apeqquteqartuttaaq nerisassanit nioqqusiat naggorissaatinik toqunartunillu akuugaanngitsut pillugit ulloq 2. april 2004 nunatta ilisimaneqarnerulernissaa pillugu isumasioqatigiisitsinermit Naalakkersuisut misilittagaat paasisaqarfigerusullugit ujartorpai.