04EM/01.25.01-77 Nunatta imminut napatinnerusumik pilersornerusumillu aningaasaqarnikkut ineriartornera siuarsarniarlugu... (Per Skaaning, Demokraatit)
30. juli 2004 UKA 2004/77
Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqqut: Nunatta imminut napatinnerusumik pilersornerusumillu aningaasaqarnikkut ineriartornera siuarsarniarlugu nunatsinnilu mingutsitsinerup annikillisarnissaa eqqarsaatigalugu nunatsinni seqernup anorillu nukiinik atuilersinnaanermut atatillugu nukissiorfinnik, suliniutinik ineriartortitsinissarlu siunertaralugu misileraanernik piviusunik aallartitsinissartik Naalakkersuisut eqqarsaatersuutigaat?
(Inatsisartunut ilaasortaq Per Skaaning, Demokraatit)
Tunngavilersuut:
Kyotomi Isumaqatigiissut Inatsisartunit akuersissutigineqarmat tamakkiisumik isumaqatigiiffiuvoq. Nukissiuutit allaanerusut ullumikkornit annertunerusumik atorneqarsinnaanerat imminullu napatissinnaanerunissap anguniarneqarnissaa, annikinnerusumik mingutsitsisoqarnissaa ilanngullugu, nunatsinni naalakkersuinikkut suliaqartut akornannit naalakkersuinikkut anguniagassatut toqqammavilersuutigineqartoq suli tusarneqanngilaq.
Utoqqarmiut Kangerluarsunnguanni iluatsittumik nukissiorfiliornikuuvugut, pinngortitap nammineq pisuussutaanik innaallagissamik kiammillu pilersitsiffigisatsinnik. Tasiilami erngup nukinganik nukissiorfiliorneq ingerlanneqarpoq. Qorlortorsuarmilu erngup nukinganik nukissiorfik ukiualuit qaanngiuppata piviusunngortussatut isikkoqarpoq. Erngup nukinganik atorluaaneq eqqarsaatigalugu ajunngitsumik ingerlavoq. Nunatsinnili nukissiuutit allat atorneqarsinnaaneranni periarfissat suli nungoqqajanngitsutut Demokraatit tungaannit isigaagut. Uuliat akiisa qaffakkaluttuinnarnerisa nunarsuarmilu uulianik tunisassiorfinni taamatullu nunani amerlasuuni ataavartumik naalakkersuinikkut toqqissisimanngittuarnerit, Demokraatit isumaat malillugu, pisariaqalersippaat maannakkornit annertunerusumik nukissiuutit allaanerusut ukiuni aggersuni pilersaarusiornitsinni isumaliutigilluakkamik ilannguttariaqalerigut.
Brintimik brintimullu teknologiimik atuinissamik Naalakkersuisut takorluugaat pissanganartuupput taamaakkaluartorli ullumikkut teknologiit piviusuninngarnit atuussinnaassuseqarnerusuniillu takorluugaannaagallartutut isikkoqarput. Teknologiit inerisarneqarneroreernissaasa tungaannut inuiaqatigiiusugut nukissiornikkut pisariaqatitagut ikummatissanit imerpalasunit pissarsiarisariaqarpavut, nukissiornitsinni allatigut tapertaasinnaasutut periarfissat misissuiffiginianngikkutsigit. Nukissiorfiit ikummatissanik imerpalasunik atuiffiusut taartissarisinnaasaannik ukiuni 20 ¿ 30-ini tulliuttuni teknologiikkut ineriartortitsinermi brintimik nukissiuutit pilersinneqarsinnaalernissaat utaqqiinnartariaqanngilarput.
Seqerngup anorilluunniit nukii pigisavut suliffissuarni, suliffeqarfinni inoqutigiinniluunniit suli iluamik atorneqarsinnaalersissimanngilagut. Taakku periarfissaqarluarput nammineq pinngortarput ersarillutillu. Erngup nukianik atuinerup saniatigut nukissiuutini allaasuni seqernup anorillu nukiinik atuineq misileraaffiunerpaajupput. Seqernup anorillu nukiinik teknologiikkut ineriartorneq ukiuni kingullerni annertuumik siuariarfiusimavoq. Ullumikkullu seqernup qinngorneranik tigoqqaanermut teknologi misilerarluarneqarsimalereerpoq Danmarkimilu nutaanik sanaartornermi annertusiartuinnartumik akulerunneqarsimalluni.
Seqernup qinngornerinik tigooqqaassutit soqutigineqarnerat Danmarkimi taamaallaat pinngilaq. Ullumikkut nunarsuarmut tamarmut uulianik tunisassiorfissuaq Shell seqernup qinngornerinik tigooqqaassutinik tunisassiornermut immikkoortortaqarpoq. Teknologiip taassuma periarfissaqarluarnera Shell-ip malugilluarsimangaaramiuk suliffeqarfik 1997-imiit 2002 ilanngullugu 500 mio. dollars-inik aningaasaliissuteqarsimavoq, seqernullu qinngornerinik tigooqqaassutit inerisarneqarnissaannut tuniniarnissaannullu 500 mio. dollars-it 2005-i ilanngullugu atornissaat pilersaaruteqarfigalugu. Ukiuni qulini kingullerni seqernup qinngorneranik tigooqqaassutit 50%-imik akikillisimassasut Shell-imit naliliiffigineqarput. Tamatuma saniatigut siunissami ineriartorneq taanna ingerlaannassasutut suliffeqarfimmit nalilerneqarpoq.
Nukissiuummik taassumannga Danmarkimi nunarsuarmilu piffinni allani atuineq annertoorujussuanngorsimavoq. Seqernup qinngornerinik tigooqqaassutinik nutaanik 1.000-it angullugit amerlassusilinnik katillugu 1 MWp-nik (mega watt peek) pilersitsisinnaassusilinnik ikkussuisoqartussaavoq. Suliniut SOL-1000-imik taaguuserneqarsimavoq, pilersaarutillu malillugit nunami tamarmi, illuni inunnit nalinginnarnit pigineqarnerusunut ikkussuunneqartussaallutik. Suliniut ukiunut sisamanut sivisussusiligaavoq, suliniutillu immikkoortua siulleq, seqernup qinngornerinik tigooqqaassutinik tamanik tunniussisussamik suliariumannittussarsiuussinikkut 2001-imi naammassineqarpoq.
Suliniutip SOL-1000-projekt-ip ilaatigut siunertaraa:
- Danmarkimi tamarmi seqernup qinngornerinik tigooqqaassutitigut teknologiip atorneqarnera siuarsaaffigissallugu
- Seqernup qinngornerinik tigooqqaassutit siunnerfiata teknikkikkut, aningaasaqarnikkut kusanassutsikkullu pilerinarsisinnissaat inerisaaffigissallugu
- Nukissiuutit ataatsimoortumik akiisa appartinneqarnissaat
- Danskit suliffeqarfiutaannik tinnersaanissaq taamatullu danskit seqernup qinngornerinik tigooqqaassutinik tunisassiaannik nunami namminermi nunanullu allanut niueruteqartarnerat inerisassallugu
- Danmarkimi seqernup qinngornerinik tigooqqaassutinik atuerusussinnaasut attaveqaatigisinnaasaannik pilersitsinissaq ataqatigiissaarinissarlu
Assersuutitut aallerfigisinnaasat amerlaqaat, sanatitsisunut piginneqatigiillunilu illuutilinnut, seqernup qinngornerinik tigooqqaassutinik atuerusuttunut, misileraanermut suliniutaasinnaasunullu tigussaasunut tapiissuteqarnikkut suliniuteqarnissatsinnut tamakku isumassarsiorfigiinnartigit, taamaalilluta teknologi taanna piviusumik misilissinnaaniassagatsigu.
Anorip nukinga eqqarsaatigalugu ullutsinni anorisaatinik sanaartorneq tunisassiornerlu nunarsuarmi milliard-it nalinginut niuerutigineqarpoq teknologiillu atorneqarsinnaanera oqallisigissallugu isumatusaarnerumaviarani. Pitsaasumik qangali angusaqarfioreerpoq ¿ taamaallaat Kalaallit Nunaanniunngitsoq. Ukiuni qulikkaani kingullerni teknologiikkut ineriartorneq sukkaqisumik ineriartortinneqartoq eqqarsaatigigaanni, erngup nukingata saniatigut nukissioriaatsit allaanerusut nunami maani atugaanerat taama killeqartigimmat tupinnarpoq. Ullumikkut illuliat nammineq sanaat, seqernup qinngornerinik tigooqqaassutitallit kallerup innerilerisartumit piginnaassusilittut allagartalimmit ajornanngitsuararsuamik innaallagissap aqqutaannut atassusilersortitat tunniunneqarsinnaasarput. Sooq illuni sulliviutitsinni, timersortarfiutitsinni, katersortarfiutitsinni, nammineq illuliaatitsinni seqernup anorillu nukii tapertatut nukissiuutitut atornianngilagut, taamaaliornitsigut inuiaqatigiit ikummatissanik imerpalasunik atuinerat annikilliliiffigalugu?
Nukissiuutit taakku atorneqarnissaannut Nukissiorfiit allallu Namminersornerullutik Oqartussat suliffeqarfiutaat ikummatissanik imerpalasunik atuinitsinnit iluanaaruteqarluartartut naam-magittaallioraluarpataluunniit, Inatsisartut Naalakkersuisullu taamaallutik ullut ilaanni aalajangersimasumik aalajangiussisimanninnermillu takutitsinissaat taamaallaat uani apeqqutaaginnarpoq. Nukissiuutit allaanerusut misissuiffiginissaannut misilerarneqarsinnaanissaannut tigussaasunillu suliniutigineqarnissaannut Namminersornerullutik Oqartussat suliffeqarfiutaat namminneq soqutigisaminnik siunissaq qaninnerusoq eqqarsaatigalugu aallussinerat kigaallisaatigineqartut kingullersarissagunarpaat. Suliffeqarfiunngitsut uagulli Inatsisartuusugut tassaasariaqaraluarpugut nukissiorneq eqqarsaatigalugu naalakkersuinikkut suliniutinik nunallu nammineq soqutigisaanik aalajangiisartut. Isumassarsianut qinaasisarfimmik uannga Center for Arktisk Teknologiillu periarfissaasa ilisimasaalu Naalakkersuisunit annertunerusumik atorneqarnissaat kaammattuutigineqarpoq.
Nalunaarusiaq ¿Moderne Grønland¿-imik taaguuserlugu miljøstyrelsemit saqqummersinneqarsimasoq apeqquteqartup nalunngilluarpaa. Kapitalimi ¿Energi i Grønland¿ NIRAS A/S RAMBØLL-imit, PA Energy-mit Risø og P.A. Pedersen-imillu suliarineqarsimasumi ilisimatuussutsikkut suliniutaasimasut ilisimatitsissutigineqarput, tassaasimagunarlunilu Namminersornerullutik Oqartussat nukissiorneq pillugu 2020 ilanngullugu pilersaarutaannut toqqammaviusoq. Seqernup anorillu nukii nunatsinni atorneqarsinnaanngitsut nalunaarusiami inerniliunneqarsimavoq. Seqernup nukinga nunatsinni periarfissaqarluatutut Center for Arktisk Teknologiimit isigineqartoq apeqquteqartumittaaq arajutsisimaneqanngilaq. Isummersuutinut imminnut assortuuttunut taakku pillugit Naalakkersuisut isummeqquneqarput.
Nukissiuutit allaanerusut annertunerusumik aallunneqalernerat Nukissiorfiit suliffeqarfiillu allat naatsorsuutaasigut toqqaannartumik takuneqarsinnaassaaq taamaattorli ikummatissanik imerpalasunik isumalluuteqarnerput annikilliliiffigissavaa, inuiaqatigiinnitsinnilu aningaasaqarnermut iluaqutaallunilu nunatta aningaasaqarnikkut imminut napatinnerulernissaanut tamatsinnit kisaatigineqartumut tapertaassaaq. Paasissutissanik pissarsiffiit: (www.sol1000.dk), (www.solenergi.dk) (www.shell.com).
Ullormut oqaluuserisassat kiisalu ullut suliarineqarfissaat