04EM/01.25.01-83 Pisortat suliariumannittussarsiuussisarnerannut atatillugu kalaallit suliffeqarfiutaasa, kiisalu kalaallit sulisartut sapinngisamik... (Anthon Frederiksen, Kattusseqatigiit)
3. august 2004 UKA 2004/83
Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.
Naalakkersuisunut apeqqut: Pisortat suliariumannittussarsiuussisarnerannut atatillugu kalaallit suliffeqarfiutaasa, kiisalu kalaallit sulisartut sapinngisamik annertunerpaamik a-torneqarsinnaanerat qulakkeerneqaqqullugu Suliariumannittussarsiuussisarneq il.il. pillugit Inatsisartut Inatsisaat nr. 3, 6. april 1992-meersoq iluarsineqartariaqartutut Naalakkersuisut nalilerpaat?
(Inatsisartunut ilaasortaq Anthon Frederiksen, Kattusseqatigiit)
Tunngavilersuut:
Suliffeqarfiit sanaartornermik ingerlataqartut nunatsinni siammasissumik inoqarfeqarnermut naleqqussarsimapput. Ullumikkut nunatsinni sanaartornerit ingerlanneqartut suliariumannittussarsiuussisarneq pillugu inatsimmit 1992-meersumit malittarisassaqartinneqarput. Suliariumannittussarsiuussisarnermut inatsimmik nutarterineq aammalu sanaartornerup iluani nutaanik aallartitsinerit nunatsinni aningaasanik kaaviiaartitsinerulernermik qulakkeerinneqataasinnaapput. Tamakkulu saniatigut sanaartornermi ilinniartut ataavarnerusumik suliffissaqartinneqarsinnaanerisa qulakkeerneqarnissat aamma pingaaruteqarpoq. Isumanga naapertorlugu siunissaq ungasinnerusoq isigalugu ilinniartitaanermut inuiaqatigiinnullu tamanna ilaatigut ilinniartut sulliviisa amerlanerulernerisigut pitsaaquteqarpoq.
Pineqartumi nutaanik aallartitsinerit nunatsinni suliffissaqartitsinermut tunngasunik sammisaqarnerulernermik kinguneqartussaapput, taammaalillunilu tamanna amerlanernik piginnaaneqarluartunik sulisoqalernermik qulakkeerinneqataassaaq. Pineqartumi suliniutinik patajaallisaanerup ungasinnerusoq isigalugu nunatta aningaasaqarnerata pitsaanerulerneranut ilapittuutaassasoq ilimanarpoq, taamaalillunilu aningaasaqarnikkut nammineernerulerneq sulisussatigullu imminut pilersorsinnaaneq nukittorsarneqassalluni. Ineriartornermut taama ittumut suliniutinik iluaqutaasinnaasunik Naalakkersuisut aallartitsilersaarpat?
Naalakkersuisut makku ilanngullugit naliliivigissagaat kissaatigaara:
Sanaartornermi sulisartut kalaallit aammalu nukiit nunatsinniittut atorluarneruneqarnissaat qanoq isilluni qulakkeerneqarsinnaava?
Nunatsinni sanaartornerit sukkanerusumik eqaannerusumillu kiisalu kinguaattoorfiunngitsumik ingerlanneqarnissaat qulakkeerumallugu Naalakkersuisut allaffissornikkut pisariillisaanerit suut suliniutigilersaapaat?