04EM/01.25.01-97 Ikittaatit gassitaannik, liimminik allanillu atornerluinermi ulorianaatinik inuusuttut ilisimaqaqqalaarnerat pillugu... (Astrid Fleischer Rex, Demokraatit)

9. august 2004 UKA 2004/97

Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.

Ikittaatit gassitaannik, liimminik allanillu atornerluinermi ulorianaatinik inuusuttut ilisimaqaqqalaarnerat pillugu Naalakkersuisunut apeqqut.

(Inatsisartunut ilaasortaq Astrid Fleischer Rex, Demokraatit)

Tunngavilersuut:

Ikittaatit gassitassaasa, liimmit il.il. pillugit inuusuttut ilisimasaat killeqarput. Misissuinerup ¿Nunatsinni inuusuttut akornanni aangajaarniutinik atuineq (ESPAD 2003)¿ takutippaa, inuusuttut ukioqatigiiaat akornanni 40,4 %-tiisa akulikitsunik naamaarnermi qanoq annertutigisumik ajoqutissarsivigineqarsinnaanera pillugu immersugassami krydsilersimagaat ¿naluara¿.

Inuusuttut ukioqatigiiaat akornanni procenti taamak annertutigisup apeqqummut ersarissumut naammaginartumik akisinnaannginnerannut, ikittaatit gassitassaanik peqqissutsimut ulorianaatilimmik naamaarnermut atatillugu ajornartorsiutaasunik ilisimasakinneq uppernarsarpaa. 

1990-ikkut naajartulerneranni inuusuttunut sammitinneqartumik naamaartarnerup ulorianaatai pillugit paasisitsiniaanernik arlalinnik aallartitsisoqarsimavoq. Ullumikkut inuusuttut naamaartarnermut annertunerusumik ilisimasaqanngimmata paasisitsiniaanerit taakku sunniutaarutereersimappat? Inuiaqatigiinni tamanna ajornartorsiut pillugu ukiut tamaasa aallaqqaataaniit paasisitsiniaanermik ingerlatseqqittalissaagut, taamaalilluta inuunermut pingaaruteqartumik paasissutissiisarnissaq inuusuttunut atornerluinissamut ilimanaateqarsinnaasunut angunnissaa qulakkeerumallugu?

Tunisassiat atornerluneqarnerisigut navianaateqarsinnaasunik inuusuttunik paasisitsiniaasoqarsinnaavoq, tamatumali inuiaqatigiit ajornartorsiutaat annertooq aaqqissinnaanngilaa. Ajornartorsiut  annertunerujussuuvoq, sianiilliornerussaarlu isumaqaraanni inuusuttunut paasisitsiniaaneq kisiat aqqutigalugu ajornartorsiummik qaangiisisoqarsinnaasoq. Taamaattumik inuusuttut pissusaat malunnaatilimmik allanngortissagaanni suliniutinik sukumiisunik aallartitsisoqartariaqarpoq. Assersuutigalugu inuusuttuni atugaasoq tujorminartoq nungutinniarlugu inuiaqatigiinni nutaaliaasuni inuusuttut piumasaat naapertorlugit illoqarfiit piumasaqaatit naapertorlugit pitsaanerusumik piviusunngortitsisinnaanerat suliniutit ilagisinnaavaat. Neqeroorutit inuusuttunut soqutiginarsinnaasut ikippallaarneri pissutigalugit inuusuttorpassuit susassaaleqisorujussuupput. Suliniutit ilagisinnaavaat sooq inuusuttut naamaarniarnermik aallartitsisarnersut paasiniassallugu. Ilisimasaqannginnermik, alapernaasernermik peqquteqarpa, imaluunniit inooqatigiinnermi ingerlalluannginnermik pissuteqartumik inuusuttut piviusunit qimaaniarnerannit tamanna tunngaveqarpa? Tamatuma qulaarneqarnissaa soqutiginaateqarsinnaavoq.

Tamanna tungavigalugu makku apeqqutigerusuppakka:

1)      Naamaartarnerup kingunerisinnaasai pillugit inuusuttut paasinnilersinneqarnissaannut maannamut Naalakkersuisut suliniutinik sunik aallartitsisimappat?

2)      Pineqartumut tamatumunnga paasisitsiniaaneq maannakkut ingerlanneqartoq Naalakkersuisut naammagaat? Taamaattoqarsimanngippat inuusuttut naamaartarneq pillugu ilisimasaat malunnaatilimmik annertusarneqarnissaanut suliniutit suut Naalakkersuisut aallartilersaarpaat?

3)      Inuusuttut oqalliseqataatinniarlugit periutsinik toqqaannarnerusunik sakkortunerusunillu allanik Naalakkersuisut eqqarsaatersuuteqarpat?

4)      Inuusuttut taama amerlatigisut naamaarniarnermik aallartittarnerat pillugu Naalakkersuisut sunik nassuiaatissaqarpat? Atornerluineq annikillisinniarlugu nutaanik suliniuteqalernissamik pissutissaqalersitsiva?

Naalakkersuisut akissutissaat qilanaaraara.