04EM/01.25.01-71 Kalaallit Nunaanni phthalateqarnera pillugu maleruagassaqalernissaanut Naalakkersuisut inatsisilioqqullugit... (Palle Christiansen, Demokraatit)

26. juli 2004 UKA 2004/71

Inatsisartut Suleriaasianni § 32 naapertorlugu matumuuna imaattumik aalajangiiffigisassatut siunnersuummik saqqummiussivunga:

Kalaallit Nunaanni phthalateqarnera pillugu maleruagassaqalernissaanut Naalakkersuisut inatsisilioqqullugit peqquneqarnissaannik Inatsisartut aalajangiiffigisassaattut siunnersuut.

(Inatsisartunut ilaasortaq Palle Christiansen, Demokraatit)

Tunngavilersuut:

Phthalateqarnera ¿ ulluinnarni qitulisaammik taaneqartartoq - pillugu aalajangersagartalimmik Kalaallit Nunatsinni maani inatsiseqannginnera ernumanartorujussuuvoq. Kingullermik ulluni juulip 23-ianni 24-iannilu 2004 radioaviisikkut tusarparput nalunnguarnermi atortunik phthalatilinnik peqartoqarnera paasineqarmat pisiniarfiutilik Pisiffik qujanartumik nammineerluni nalunnguarnermut nioqqusiat peersimagai.

Phthalatit qitulisaataapput stoffit plastimut qitulisaatitut akulerunneqartartut.

Phthalatit pasineqarput kræfteqalersitsisinnaasoralugit, 1999-imiillu stoffi taanna meeqqanut pingasut ataallugit ukiulinnut pinngussani atorneqartutut EU-mi inerteqqutinngorsimavoq. Aammattaaq paasineqarsimavoq phthalatit uumasuni sapigaqarnermik nappaateqalersitsinnaasut.

Phthalatit sorpassuarniittut avatangiiserpassuarniittullu paasineqarsimavoq. Ilaatigut pinngussani, atisani atugassatullu nioqqusiani allani phthalatit nassaassaapput. Phthalatit nerisassiani nassaassaapput, phthalatillu annertunerpaat nerisassianut poortuutissiani toqqaannartumik phthalatinik akuulinniittarpoq, stoffilli taakku inuussutissatut nioqqusiani annikitsunnguakkaarlutik, sunik poortuuteqarnersut apeqqutaatinnagu, tamaniittarput. Natissiani PVC-mik taaneqartartuni phthalateqarnera nalunngilarput, tamatumalu ilisimatuut pasisaqalersissimavai inunni sapigaqarnermik annertunerusumik nappaateqartoqartarneranut patsisaaqataasoralugit. Aamma nakorsaatinut atortuni phthalatit nassaassaapput, phthalatimmi PVC-mut qitulisaatini annertunerpaamik atugaammata. Aammattaaq immap erngani, imermi, silaannarmi pujoralannilu aammalu silaannarsuarmi phthalatinik nassaartoqarsimavoq.

Naluneqanngilluarpoq atortussiat phthalatinik akullit taarserneqarsinnaammata.

Aallaqqaammut Demokraatinit Naalakkersuisut peqqujumavagut taakkununnga tunngasut piaarnerpaamik maleruagassiussagaat, taamaaliunngikkuttami peqqinnermut avatangiisinullu phthalatit ajoqusiisarnerannik ilisimasaqarnerput tunngavissaqarluartumillu pasitsaasimasaqarnerput akisussaassuseqanngitsuliornerussammata. Naalakkersuisut ajornartorsiutip annertussusianik sukumiisumik nalileereerpata maleruagassatullu siunnersuummik saqqummiussereerpata erseqqinnerusumik maleruagassiortoqarlunilu naalakkersuinikkut eqqortumik isummertoqassaaq.

Demokraatini isumaqarpugut akoorutissat maleruagassiuutissagaanni mianersortumik periuseqarneq aallaaviusariaqartoq.

Taamatut naatsumik tunngavilersuuteqarluta Demokraatinit qilanaaraarput siunnersuutip Inatsisartunit ilalerneqarnissaa