04EM/01.25.01-127 Qeqertarsuarni Artisk Stationip nunatsinnilu sulliviit assigisaasalu akornanni suleqatigiittoqarnissaa... (Agathe Fontain, Inuit Ataqatigiit

12. august 2004       UKA 2004/127

Inatsisartut suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.

Naalakkersuisunut apeqqut: Qeqertarsuarni Artisk Stationip nunatsinnilu sulliviit assigisaasalu akornanni suleqatigiittoqarnissaa pilersissallugu periarfissaqarpa?

(Inatsisartunut ilaasortaq Agathe Fontain, Inuit Ataqatigiit)

Tunngavilersuut:

Arktisk Station-i Qeqertarsuarniittoq 1953-miilli Københavns Universitet-imit ingerlanneqalersimasumi, taamatut piviusunngortitsisimanermi siunertarineqarpoq tassani issittumi ilisimatusarnerup annertusarneqarsinnaanissaa annertuumik ilisimatusaatigineqartarlutik pinngortitamut avatangiisinullu tunngassuteqartut. Tamatumani annertunerusumik ilisimatuut ilisimatuunngorniartullu danskiusut allamiullu pikkorissartinneqartarput imaluunniit Arktisk Station-imi ilisimatuutut sulisinneqartarlutik, paasisatillu nunagisaminnut oqquteqqittarlugit. Issittumi Ilisimatusarfimmi pineqartumi danskinit ilisimatuunngorniartunit ilisimatuunillu soorlu naasunik, pinngortitalerinermik, avatangiisinut aammalu sermersuarmut tunngassuteqartut ilisimatusarfigineqartarput. Issittumi naasut pissuserisaat, nunap pissuserisaa aammalu avatangiisit pinngoriartorsimanerannik taamatullu avatitsinni immap pinngoriartorsimanera pissuserisaalu pillugit ilisimalikkat, nunatsinnut taamatullu nunatsinni soqutiginnittunit pissarsiarissallugit iluatinnaateqarluartuupput, tassami avatangiisitta allanngoriartorluni pissuserisaa, piniarnermik aalisarnermillu inuussutissarsiornitsinnut pissarsiarissallugit pingaaruteqartorujussuummata.

Pingaaruteqarpoq anguniassallugu Kalaallit Nunaani issittumi avatangiisitta pissuserisaannut tunngasuteqartut tamaasa pissarsiariniarnissaat. Tassami kissaatiginarmat, ilisimatusarfimmi Arktisk Station-imiittumi paasisat nunatsinni toqqaanartumik iluaqutaalersinnaanissaat, soorlu nunatsinni ilinniarfinni Pinngortitaleriffillu aqqutigalugit paasisat nunatsinni siaruarterneqartalernissaat eqqarsaatigalugu. Taamaattumik Naalakkersuisut qinnuigissavakka apeqqutiginiakkakka ukua akissuteqarfigeqqullugit:

Qanoq annertutigisumik Kalallit Nunaat, Arktisk Station-imi  Qeqertarsuarmiittumi, ilisimatuussuttitigut sulineq tunngavigalugu iluaquserneqartarpa?

Periarfissaasinnaanerlu Arktisk Station/Københavns Universitet-ip aammalu nunatsinni soqutigisaqartut akornanni annertunersumik suleqatigiinikkut paasissutissat pillugit agguaaseqatigiittoqalersinnaanissaa siaruarterisoqartalernissaalu aqqutissiuutissallugu?

Naalakkersuisut suliniuteqalereersimanerlutik Arktisk Station/Københavns Universitet-ip aammalu nunatsinni ilinniarfiit aammalu soorlu Pinngortitaleriffiup akornanni suleqatigiinnerup annertusarneqarsinnaanera eqqarsaatigalugu?