04EM/01.25.01-145 Nunatsinni innuttaasut nunatsinni inatsisinik pisariinnerusumik ilisimaqarnerulernissaasa... (Per Berthelsen, Demokraatit)

13. august 2004       UKA 2004/145

Inatsisartut suleriaasianni § 36, imm. 2, naapertorlugu Naalakkersuisunut apeqqut imaattoq matumuuna saqqummiuppara.

Naalakkersuisunut apeqqut: Nunatsinni innuttaasut nunatsinni inatsisinik pisariinnerusumik ilisimaqarnerulernissaasa qulakkeerneqarnissaa siunertaralugu inatsisit pillugit nalunaarutinik suliaqartoqarnissaa Naalakkersuisut sulissutigilersaarpaat?

(Inatsisartunut ilaasortaq Per Berthelsen, Demokraatit)

Tunngavilersuut:

Namminersornerullutik Oqartussaqarneq ukiuni 25-ini atuussimavoq. Suli nutaajukannersumik inatsisartoqarnermik aaqqissuussinermik ingerlatsivugut, kianni kuummi kuuttutut ukiuni 25-ini inatsisiliornikkut tukattumik ingerlavugut. Taama nutaatigisumik periuseqarnerup periarfissilluarpaatigut nammineq isumarput naapertorlugu qanoq iliuuseqarnissatsinnut. Pisariitsumi, paasiuminartumik, piviusorsiortumik sunniuteqarluartumillu ingerlanneqarsinnaagaluarpoq. Kalaalinngorsaanerulluartumik oqariartuut.

Nunatsinni inatsisit atuuttut qiviaraanni, innuttaasunut ataasiakkaanut, suliffeqarfinnut, inatsisit atuuttut sukkasuumik sunniuteqarluartumillu paasineqartarnissaat pingaartuuvoq. Tamannarpiarlu ajornaatsuinnaanngilaq, innuttaasummi oqartussaasullu inatsisinik atuuttunik ersarissumik paasinninnissaannut atatillugu inatsisilersuujunissaat paasiniaasartuunissaalluunniit qanoq iliuuseqarsinnaannginnermut qanillattornerussaaq. Aalisartuuguit pisussaaffeqarlutillu aalisarnermilu inatsisit ilisimasaqarfiginissaat pisariaqartillugu, taava tammana pisariitsuinnaanngilaq. Tassami 1996-imiilli inatsit allanngorteqaqattaarneqarsimavoq. Akileraartartuuguit, attartortuuguit, isumaginninnikkut ikiorsiivigineqartaruit, ikiorsiissutinik pisartagaqaruilluunniit Namminersornerullutillu Oqartussanut tunngatillugu piginnaatitaaffeqaruit pisussaaffeqaruillu, inatsimmik ersarissumik ilisimasaqarnissaq pisariitsuusariaqaraluarpoq.

Inatsisit allannguutissatullu inatsisit ataatsimut allanneqartillugit ¿ inatsisinut nalunaarutinik taaneqartartut, ajornartorsiut ussatigineqartut aallaavigalugit aaqqinneqarsinnaagunarpoq: Pisariillisaaneq suliaqarnerunissamut siuarsaataasarpoq. Aqutsisoqarfik aaqqiissuteqajaaruni  innuttaasunut oqinnerussaaq.

Inatsist pillugit nalunaarutinik suliaqarnissamik Naalakkersuisut sulissuteqalersaarpat? Tamanna nunatsinni innuttaasut kalaallit malittarisassaannik pisariinnerusumik ilisimasaqarnerulernissaannut qulakkeerinnissammat.

Naalakkersuisut kalaalinngorsaanermut suliniuteqarnerannut inatsisit pillugit nalunaarutit ilaappat?

Taamaattoqarsimanngippat kalaallit inatsisiliorneranni kalaalinngorsaanerup pisariillisaanerullu ingerlanneqarnerat Naalakkersuisut qanoq malinnaaviginiarpaa