Inatsisartut ullormut oqaluuserisassaannut ilanngutat

Siunnersuutinut apeqquteqaatinullu Inatsisartunit suliarineqaqqullugit kissaatigineqartunut Inatsisartut Suleriaasianni ilusiliinissamut piumasaqaatinik arlalinnik aalajangersagaqarpoq, katersuunnerullu ingerlanneqarnissaa sioqqullugu suliassanut Inatsisartunit sulineqartussatut kissaatigineqartunut atatillugu  naqitigassanik ilioqqaanissamut, naqitigassat amerlassusissaannut assigisaannullu ilassutitut piumasaqaatinik Inatsisartut Allattoqarfiat suliaqartarpoq.

Siunnersuutit suliassallu allat Naalakkersuisuneersut, ilusissaattut piumasarineqartut malillugit ilusilittut Inatsisartut Allattoqarfiannit tiguneqarnermik kingorna sapaatip akunnerisa pingasut qaangiunneranni aatsaat suliarineqarsinnaasut,  Inatsisartunulli ilaasortat siunnersuutaat apeqquteqaataallu ilusissaattut piumasarineqartut malillugit ilusillit Inatsisartut Allattoqarfiannit tiguneqarnermik kingorna sapaatip akunnerisa marluk qaangiunneranni Inatsisartut ataatsimiittarfianni aatsaat suliarineqarsinnaasut tamatuma peqatigisaanik Inatsisartut Suleriaasianni aalajangersarneqarsimapput.