04EM/01.25.01-147 Qinersisarnermut inatsisip allanngortinneqarnissaa pillugu apeqquteqaat aallaavilagulugu... (Per Rosing-Petersen, Siumut)
13. august 2004 UKA 2004/147
Inatsisartut suleriaasianni § 35 naapertorlugu apeqquteqaat aallaavigalugu oqallisissiatut siunnersuut imaattoq matumuuna saqqummiuppara:
Qinersisarnermut inatsisip allanngortinneqarnissaa pillugu apeqquteqaat aallaavilagulugu oqallisissiatut siunnersuut.
(Inatsisartunut ilaasortaq Per Rosing-Petersen, Siumut)
Tunngavilersuut:
Misissuinerit arlallit takutittuarpaat soorlu aamma kingullermik Namminersorneq Pillugu Isumalioqatigiissitap isumaliutissiissutaani uppernarsiseqqinneqartoq aammalu misissuinerit arlallit takutittuarpaat, agguaqatigiisillugu tikisitaq nunatsinniittartoq ukiup aappaa avillugu.
Assersuutissaq tamatumunnga ersersitsisoq: Namminersornerullutik Oqartussat iluani tikisitat nutaat qulit tikikkaagata ukioq ataaseq naanngitsoq sisamat aallareersimasarput.
Naliginnaasumillu qinersivik ataaseq ukiunik sisamanik sivisussuseqartartoq sanilliutissagutsigu naatsorsoruminaatsutut isigisariaqanngilaq qinersiviup ataatsip iluani qasseriaq tikisitat taarseraatsigisinnaatigineri. Tamanna nunatta karsianut annertuumik aningaasartuutaanaanngilaq aammali misilittakkat qaammaasallu nunatsinniit anianerujussuanik ajoraluartumik kinguneqartarluni.
Naalagaaffeqatigiikkaluarluta danskit ajoraluartumik nunatsinni pissutsinik ilaatigut tupannartumik ilisimasakinnerujussuat aamma naliginnaavoq. Nunarpullu inukikkaluarluni isorartoorujussuuvoq piorsarsimassutsikkullu sutigullumi tamatigut Danmark-imiit allaanerujussuunini pissutigalugu imaasiallaannaq immikkuullarinnerput pissutigalugu pulaffigineqarsinnaaneq ajorluni. Tamanna arlalinnit qujanartumik isertuanani nassuerutigineqartarpoq, pissutaasullu qularnanngitsumik ilagaat oqaatsitigut pulajumanngittarnerat.
Toqqammaviit tamakkorpiaat tunngavigalugit nunani allani aammalumi Danmark-imi piumasaqaataavoq nunami allaneersut aatsaat ukiorpassuit (qanittukkut Danmark-imi ukiut tallimaninngaaniit ukiunut arfineq marlunnut tallivaat) qaangiutereerpata aatsaat qinersisinnaatitaalersarnerat. Tamannalu ilaatigut nunani allani ¿integrationspolitik¿-i aqqutigalugu aaqqinniarneqartarpoq.
Oqariartuutiginianngilara tamakku nunatsinni maleqqissaassagigut kisiannili pissutsinik massakkumut naleqqiullugu qinersisalinnginnermini ilisimasaqarnerunissaat pisariaqarpoq.
Pissutsit tamakku tunngavigalugit piffissanngorpoq nalilersussallugu tikisitat ukiup affaannaa maaneereeraangamik qinersisinnaatitaalersarnerat naapertuunnersoq, tassami assersuutigalugu tikisitaq qinersinissaq qaammatit arfineq pingasut sioqqullugit tikittoq agguaqatigiisillugu qinersereernerup ukiumik ataatsimik suli qaanginngikkaa nunarput qimareersimasinnaasarpaa.
Taamaattumik tunngavilersuutit qulaani taakkartukkakka toqqammavigalugit naapertuutinngittutut taasariaqarpoq. Qinersisinnaatitaanerullu piumasaqaatai sakkortusassallugit piffissanngorpoq ilanngullugulu nalilersorlugu assersuutigalugu ukiut talllimat tungaanut inissittariaqalinnginnersoq, equnganermi annertuallaaqaaq aaqqiitariaqarlunilu.
Isumaqarpungalu Naalakkersuisut tamakku toqqammavigalugit ataatsimiititaliarsuit allallu utaqqeqqaanngikkaluarlugit equnganerit tamakku aaqqinniarlugit maannagaaq suliniuteqaqqullugit kaammattorneqartariaqartut.